Robbie Williams styður áfengislausar lausnir í bjórbransanum

Breski tónlistarmaðurinn Robbie Williams

Breski tónlistarmaðurinn Robbie Williams hefur gengið til liðs við ástralska bjórframleiðandann Heaps Normal, bæði sem fjárfestir og samstarfsaðili.

Merkið, sem hefur vakið mikla athygli fyrir ferska og framsækna nálgun á áfengislausan markað, er B Corp-vottað og leggur áherslu á að breyta hefðbundinni drykkjumenningu með léttum og jákvæðum boðskap.

Áhugi Williams kviknaði þegar hann kynntist vörumerkinu á tónleikaferðalagi í Ástralíu og hafði samband við stofnendur þess í gegnum Instagram. Samstarfið hefur síðan þróast í sameiginlegt átak til að kynna nýja sýn á „eðlilegt“ þegar kemur að neyslu bjórs. Williams, sem hefur lifað áfengislausu lífi í rúm 20 ár, segir verkefnið honum afar kært og sér í því tækifæri til að styðja við jákvæða breytingu í bjór- og vínmenningu, að því er fram kemur í tilkynningu frá Heaps Normal.

Heaps Normal var stofnað árið 2020 af Jordy Smith, Andy Miller og Ben Holdstock. Fyrirtækið hefur á skömmum tíma byggt upp sterka stöðu á áströlskum markaði og hóf í sumar sölu í Bretlandi, þar sem vörur þeirra eru nú fáanlegar í yfir 170 pöbbum og verslunum.

Í vörulínunni má finna bjóra eins og Quiet XPA, Half Day Hazy, Another Lager, Cheeky IPA og Jazz Stout. Þrátt fyrir að innihalda örlítið magn áfengis vegna náttúrulegrar gerjunar, er það sambærilegt við magn sem finnst í þroskuðum banana og ekki nægilegt til að valda vímu.

Auk framleiðslunnar hefur Heaps Normal lagt sitt af mörkum til tónlistar- og listalífsins í Ástralíu með ýmsum menningarverkefnum, þar á meðal stuðningi við geðheilbrigði listafólks.

Myndir: aðsend / Heaps Normal