Ostabúðin dregur sig í hlé

Ostabúðin við Fiskislóð 26
Mynd: facebook / Ostabúðin

„Við í Ostabúðinni drögum okkur í hlé og höfum því lokað á Fiskislóðinni. Þetta er ekki endastopp og við hlökkum til að taka aftur á móti ykkur seinna.“

Segir í tilkynningu frá Ostabúðinni.

Ostabúðin við Skólavörðustíg í Reykjavík þekkja margir Íslendingar, en búðin opnaði fyrst árið 2000. Þar var boðið upp á áður óséð úrval af ostum og öðru góðgæti, auk þess sem töfraður var fram heitur matur í hádeginu. Ostabúðin opnaði veitingastað við hlið búðarinnar árið 2015.

Ostabúðin lokaði árið 2019 en þá var rekstrarkostnaður orðinn of mikill og forsendur þess að halda lágu vöruverði brostnar, sagði Jóhann Jónsson, matreiðslumaður og eigandi Ostabúðarinnar, í samtali við veitingageirinn.is rétt eftir lokun búðarinnar.

Jóhann Jónsson, matreiðslumaður
Mynd: facebook / Ostabúðin

Jóhann opnaði nýja Ostabúð um áramótin 2019/2020 út á Granda og bauð upp á bæði glæsilegan veislusal og veisluþjónustu, að auki verslunina Ostabúðin við Fiskislóð 26, en húsnæðið er nú til leigu.

Sjá einnig: Til leigu atvinnuhúsnæði á tveimur hæðum – Tilvalið fyrir eldhús og veislusal

Fiskislóð 26.
Mynd: Smári / Veitingageirinn.is

Ostabúðin bauð einnig upp á fyrirtækjaþjónustu, þar sem heitur matur var sendur til fyrirtækja í hádeginu ásamt því að bjóða upp á hádegishlaðborð á virkum dögum.