Omnom á lista hjá Vogue

Íslenska súkkulaðið frá Omnom hefur slegið í gegn hjá súkkulaðiunnendum beggja vegna Atlantshafsins en nú síðast rataði það á lista septemberblaðs breska Vogue yfir „lúxushluti“.

Þar er bent á að súkkulaðið hafi unnið til fjölmargra verðlauna auk þess sem umbúðarhönnunin sé litrík og áberandi.

Í Bretlandi fæst súkkulaðið í verslunum Selfridges og Harvey Nichols, að því er fram kemur á mbl.is.

Framleiðslan hófst haustið 2013 og fékk Omnom inni á gömlu bensín­stöðinni á Austurströnd 7, sem fyrirtækið leigir af Skeljungi. Þar var áður rekin kökugerðin Hressó kökur.

Í níu mánuði þar á undan vorum við að þróa uppskriftir og gera tilraunir heima í eldhúsi, og spreyta okkur á því að gera súkkulaðið alveg frá grunni,

sagði Óskar Þórðarson, forstjóri Omnom, í samtali við Morgunblaðið í vor.

Súkkulaðitegundirnar eru átta talsins auk þess sem hátíðarblöndur eru framleiddar í kringum jólin.  Nú nýlega hætti Omnom með framreiðslu á tveimur vörutegundum þar sem hráefni hefur ekki staðist gæðakröfu Omnom.

Fyrr á árinu var súkkulaðiverksmiðjan flutt út á Granda en meirihluti framleiðslunnar er fluttur úr landi.

Greint frá á mbl.is.

Mynd: af facebook síðu Omnom.