Norræna nemakeppnin haldin í Helsinki – Steinn Óskar: „Íslenska liðið hefur lagt mjög hart að sér við æfingar…“

Norræna Nemakeppnin í framreiðslu og matreiðslu verður haldin í Helsinki dagana 26. og 27. apríl næstkomandi. Tveir keppendur í hvorri grein keppa saman sem lið.

Elvar Halldór Hróar Sigurðsson og Daníel Árni Sverrisson

Framreiðslunemarnir keppa í helstu hæfniþáttum framreiðslustarfsins s.s. þjónustu, að undirbúa, leggja á borð, brjóta saman servéttur og skreyta fyrir 6. manns, blind- vínsmakki, blöndun áfengra og óáfengra kokteila, para saman vín/drykki- og matseðil, fyrirskurð, eldsteikingu og framreiðslu.

Andrés Björgvinsson og Óðinn Birgisson

Matreiðslunemarnir keppa meðal annars í beitingu mismunandi matreiðsluaðferða, framsetningu á réttum og bragði. Fyrri daginn er verkefnið að útbúa klassíska velouté á nýjan máta og eiga nota grænan aspas sem aðalhráefni, í millirétt á að laga tvo mismunandi lystauka (amuse bouche) þar sem nota á Brie ost og hörpuskel í skelinni. Aðalrétturinn er svo nýstárleg útgáfa af klassískri finnskri kjötsúpu ”Karelian stew” sem inniheldur nautakjöt, svínakjöt, gulrætur, lauk og krydd.

Á degi tvö er verkefnið leyni karfa (mistery basket) þar sem keppendur fá að vita aðalhráefnið rétt áður en keppnin hefst og þar vinna bæði liðin saman að gera matseðilinn sem svo matreiðslunemarnir elda og framreiðslunemarnir para vín við.

Steinn Óskar Sigurðsson, matreiðslumeistari

„Íslenska liðið hefur lagt mjög hart að sér við æfingar undanfarnar vikur og er núna klárt í stóru keppnina.“

Sagði Steinn Óskar Sigurðsson, leiðtogi í matvæla- og veitingagreinum Iðunnar í samtali við veitingageirinn.is.

Keppendur í framreiðslu eru Elvar Halldór Hróar Sigurðsson nemi á veitingastaðnum OTO og Daníel Árni Sverrisson nemi á veitingastaðnum Monkeys og keppendur í matreiðslu eru Andrés Björgvinsson og Óðinn Birgisson báðir nemar á Grand Hótel Reykjavík

Þjálfari framreiðslunemana er Axel Árni Herbertsson og þjálfari matreiðslunemunum er Gabríel Kristinn Bjarnason.

Myndir: aðsendar