Norðurfjörður – 1. kafli | Landnámssetrið og Kaffi Norðurfjörður | Veitingarýni

Jæja þá eru við félagarnir lagðir af stað í enn einn túrinn og er stefnan tekin á Norðurfjörð. Við höguðum brottför þannig að við vorum í hádeginu í Borgarnesi en þar ætluðum við að snæða hádegisverð í Landnámssetrinu.

Komu við inn og var bara góð traffík en það var eitt laust borð og fengum við okkur sæti og fengum matseðla og sódavatn á kantinn.

Við ákváðum að panta eftirfarandi:

Spínatlasagna með kasjúhnetum og salati

og

Nautaborgari (150 gr) gerður úr Mýranautakjöti frá Leirulæk með smjör steiktum lauk, ofnbökuðum kartöflubátum, grænu salati, tómötum og agúrkum

Og í eftirrétt:

Eyjafjallajökull – Volgur súkkulaðihraunmoli með Erpstaðaís

og

Íslenskur grjónagrautur með kanilsykri, rúsínum og rjómablandi

Þetta var það sem við fengum á borðið:

Pasta Tagilatelle… „alls ekki það sem pantað var“

Pasta Tagilatelle með spínati og furuhnetum, var svo sem í lagi en alls ekki það sem pantað var.

Nautaborgari

Nautaborgarinn reyndist vera buff sem minnti frekar á norska kjötköku en hamborgara úr lúxus nautakjöti, bragðið minnti mann á hlut sem var til hér á árum sem hét, hackbratenfix og var frá Knorr með bragðefnum og bindiefnum auks þess varð bragðið vont með þessu.

Svo komu ábætarnir:

Eyjafjallajökull

Eyjafjallajökull; var skot langt framhjá.

Íslenskur grjónagrautur

Grjónagrauturinn; hann sló í gegn, flottari framreiðslu á honum hef ég ekki upplifað og bragðgóður, þarna sá maður blossa af metnaði sem að bjargaði hádeginu.

Héldum við svo áfram yfir Bröttubrekku í gegnum dalina og yfir á Hólmavík, þar var stutt stopp og svo haldið áfram fram hjá Gjögri, Djúpuvík og yfir í Norðurfjörð, en þar ætluðum við að gista í 2 nætur á Bergstangi sem er gistiheimili.

Kaffi Norðurfjörð

Fórum við inn á Kaffi Norðurfjörð og gengum beint í flasið á vertinum en hann heitir Sveinn Sveinsson framreiðslumeistari sem að flestir þekkja í gegnum Fram, Hótel Sögu og Golfið, bauð hann okkur sæti og tókum við smá spjall.

Graflax með ristuðu brauði og sinnepssósu

Svo vorum við orðnir svangir og fengum okkur graflax með ristuðu brauði og sinnepssósu. Smakkaðist það alveg svakalega gott.

Heimabakað brauð

Svo kom heimabakað brauð á borðið með basilpesto.

Steiktar Fiskbollur ( Heimalagaðar ) með brúnni sósu, kartöflum og salati.

Þorskhnakki með tómatconcasse, rauðlauk, blaðlauk, kartöflum, salati og djúpsteiktu rabbabarahýði.

Alveg glerfínn matur sem að sæmdi sér vel í sveitinni.

Þá vorum við orðnir mettir og vorum farnir að sjá beddann í hillingum, þökkuðum við fyrir og löbbuðum yfir planið og inn á herbergi og beint inn í draumalandi í annars skonar ferðalag.

/Sverrir