Mjólka íhugar að kæra Osta- og smjörsöluna fyrir að nota orðið ,,feta"

Mjólka ehf. segist nú íhuga kæru á hendur Osta- og smjörsölunni fyrir að nota orðið FETA á sínar afurðir án leyfis. Hefur sérstök tilkynning vegna þessa verið send fjölmiðlum.

Í henni segir: ,,Í tilefni af kröfu Osta- og smjörsölunnar um að Mjólka hætti að selja ost sinn FETA til neytenda í sérhönnuðum umbúðum fyrirtækisins vill Mjólka taka fram eftirfarandi:

FETI er lögformlega skráð vörumerki og eign Mjólku ehf. Fyrirtækið hefur ótakmarkað leyfi til að nota það á vörur sínar og hyggst gera það áfram þrátt fyrir hótanir samkeppnisaðila um lögbann. Mjólka íhugar hins vegar að krefjast þess að Osta- og smjörsalan hætti að nota orðið FETA á umbúðir sínar þar sem það vörumerki er lögformlega skráð eign Mjólku ehf hjá Einkaleyfastofu.

Osta- og smjörsalan notar vörumerkið FETAOST á sínar afurðir en það er óskráð. Grikkir hafa hlotið alþjóðlega viðurkenningu á því að þeir eigi þetta vörumerki og er Mjólku kunnugt um að stjórnvöld þar í landi hyggi á aðgerðir gegn þeim framleiðendum sem nota vörumerkið FETAOST á sínar vörur í óleyfi.

Mjólka skilur vel viðbrögð Osta- og smjörsölunnar sem ekki er vön því að starfa á samkeppnismarkaði. Sérstaklega í ljósi þess að á tæplega hálfu ári hefur Mjólka náð yfir 50% markaðshlutdeild á neytendamarkaði og enn stærri hlut á stórnotendamarkaði, þ.e. í sölu á FETA til veitingahúsa og framleiðenda.“

Greint frá á mbl.is

Auglýsingapláss

[email protected]