Matvælasjóður fær 250 milljón króna viðbótarframlag

Kristján Þór Júlíusson, sjávarútvegs- og landbúnaðarráðherra

Matvælasjóður mun fá 250 milljón króna viðbótarframlag á næsta ári samkvæmt nýbirtu fjárlagafrumvarpi. Alls er því áformað að sjóðurinn muni hafa 628 milljónir til umráða á næsta ári og stefnt er á næstu úthlutun úr sjóðnum á vormánuðum 2021.

Kristján Þór Júlíusson, sjávarútvegs- og landbúnaðarráðherra:

„Með stofnun Matvælasjóðs fyrr á þessu ári vorum við í krafti nýsköpunar og þróunar að hvetja til aukinnar verðmætasköpunar í íslenskri matvælaframleiðslu til hagsbóta fyrir samfélagið allt. Það er því sérstaklega ánægjulegt, og um leið mikilvægt í núverandi ástandi, að auka enn frekar tækifæri sjóðsins til að styrkja öflug verkefni um allt land. Sú ákvörðun mun vafalaust skila sér í enn frekari sókn íslenskrar matvælaframleiðslu á komandi misserum og árum.“

Frumvarp Kristjáns Þórs Júlíussonar, sjávarútvegs- og landbúnaðarráðherra, um stofnun sjóðsins var samþykkt á Alþingi í apríl sl. og var alls 500 milljónum króna varið til stofnunar sjóðsins og verður þeim úthlutað á þessu ári.

Áætlað var að sjóðurinn hefði til umráða tæplega 400 m. króna árlega en í fjárlagafrumvarpi ríkisstjórnarinnar er gert ráð fyrir 250 milljón króna viðbótarframlagi til að styðja við nýsköpun, verðmætasköpun og samkeppnishæfni íslenskrar matvælaframleiðslu. Er það liður í mótvægisaðgerðum ríkisstjórnarinnar vegna veirufaraldursins en sérstök áhersla er lögð á uppbyggingu með nýsköpun í þeirri aðgerðaáætlun.

Alls bárust 263 umsóknir í fyrstu úthlutun sjóðsins, en umsóknarfrestur var til 21. september sl.

Sjá einnig:

263 umsóknir í Matvælasjóð

Nú vinna fagráð sjóðsins að því að meta umsóknir úr fyrstu úthlutun sjóðsins og í kjölfarið mun stjórn sjóðsins gera tillögu til ráðherra um úthlutun úr sjóðnum. Stefnt að því að niðurstöður verði kunngerðar um næstu mánaðarmót.

Mynd: stjornarradid.is