Mark Lundgaard – Gallery Restaurant á Hótel Holti – Veitingarýni – F&F

Það þarf nú varla að kynna Gallery Restaurant á Hótel Holti. Í ár fengu þeir Friðgeir Ingi og félagar á Gallery Restaurant til sín danska kokkinn Mark Lundgaard. Mark er yfirkokkur á veitingastaðnum Kong Hans Kælder í Kaupmannahöfn. Þar eru þeir með klassíska franska matargerð og passar því maðurinn vel inn í umhverfið hjá þeim á Gallery Restaurant.

Mark Lundgaard

Fyrsti réttur á matseðlinum var:

Ostrur með saltbakaðri sellerírót, sýrðum rjóma og fáfnisgrasi

Frekar bragðmildur en góður réttur. Okkur fannst að sellerírótin væri of mikill hluti af heildarbragðinu í réttinum og var aðeins að ræna hásætinu af ostrunum sem voru virkilega góðar. Framsetningin var falleg en kannski örlítið litlaus.

Næsti réttur var:

Hörpuskel og kavíar fra Jacob Rossini ásamt reyktu smjöri

Þessi réttur var toppurinn. Okkur fannst það ekki við hæfi á svona fínum veitingastað að sleikja diskinn þannig við ákváðum að sleppa því, en við vorum báðir sammála um það að þennan rétt væri erfitt að toppa.

Bakaður þorskur og stúfaðar kartöflur með steinselju og kartöfluflögum

Fallegur, góður á bragðið og vel eldaður réttur.

Aðalrétturinn var svo:

Lambahryggur og lambahjörtu, kremuð pólenta og blóðbergsgljái með svörtum ólífum

Mjög góður balance í þessum rétt, gljáinn var virkilega góður.

Að lokum var það:

Súkkulaðitart og sýrðar híbenurósir með vanilluís

Þegar við brutum skelina á tartinu lak þetta æðislega volga súkkulaði á diskinn hjá okkur sem svo blandaðist við ísinn og sýrðu hýbenurósirnar. Þetta er eftirréttur að mínu skapi. Fullkominn endir á þessu kvöldi.

Eftir máltíðina fengum við aðeins að líta inní eldhús hjá þeim og smelltum nokkrum myndum af þeim.

Takk kærlega fyrir okkur

/Bragi