Kaupandinn beið of lengi með að verka óslægðan fiskinn

Forráðamaður fiskmarkaðar sem seldi línuýsu sem dæmd var af Fiskistofu óhæf til manneldis, segir kaupandann hafa beðið of lengi með að verka óslægðan fiskinn. Fullyrðingar kaupanda um að aflinn hafi ekki verið kældur séu alrangar.

Fiskur sem Stjörnufiskur í Grindavík keypti á fimmtudag af fiskmarkaðinum Örva á Skagaströnd var óhæfur til manneldis. Þetta er álit Fiskistofu sem skoðaði fiskinn á föstudag. Í skýrslunni kemur fram að aflinn hafi ekki verið slægður, hreinsaður eða kældur og legið í blóðbaði.

Lárus Ægir Guðmundsson, framkvæmdastjóri Örva, segir línubátinn sem veiddi ýsuna hafa verið með nægan ís til að kæla aflann. Það séu fyrirmæli frá Stjörnufiski að slægja ekki fiskinn. Nauðsynlegt er að slægja fiskinn áður en of langur tími líður til að hann skemmist ekki, segir Lárus. Hann segir flutningafyrirtæki hafa skilað fiskinum til Grindavíkur snemma um morgunn.

Ástæða þess að fiskurinn er í svo slæmu ásigkomulagi þegar Fiskistofa skoðar hann er sú að hann hafi legið óslægður í 26 klukkustundir. Lárus segir kvartanir af þessu tagi sjaldgæfar. Sala á fiski á markaðnum ríflega tvöfaldaðist í fyrra og nam 4.500 tonnum.

********

Segðu þína skoðun

Greint frá á ruv.is

[email protected]