Fékk bíl í bakaríið

Frá vettvangi

Lilja Bjarnadóttir starfsstúlka í Sveinsbakarí við Engihjalla í Kópavogi var að afgreiða mann í morgun þegar jeppi kom keyrandi inn í anddyrið. Lilju var brugðið en segir mestu máli skipta að enginn hafi slasast. Eigandi bílsins var umræddur maður en bíllinn er sjálfskiptur.

„Þetta var algjört óhapp, enda var bílstjórinn inni að versla hjá mér þegar bíllinn hans kemur æðandi inn,“ segir Lilja í samtali við Vísi.

Hún segir bílinn vera sjálfskiptan og hann hafi farið mannlaus af stað. „Hann fer þarna upp misfellu sem er fyrir utan og í raun upp í mót þar sem planið hallar aðeins og myndar upphækkun. Það hefur hægt verulega á honum annars hefði hann farið lengra inn,“ segir Lilja.

Lilja segist í fyrstu hafa haldið að einhver hefði misst eitthvað frammi á gangi. „Síðan brá mér nokkuð þegar ég lít upp og sé bílinn sem þá er kominn inn í anddyrið.“

Hún segir þó mestu máli skipta að enginn hafi orðið fyrir bílnum, það hefði getað farið mun verr.

Mynd: /Gúi
Af vef Visir.is