Eldhús í ofurkeyrslu: 1.000 starfsmenn umbreyta Mercedes-Benz Stadium á innan við 18 klukkustundum

Matt Cooper er yfirkokkur í Mercedes‑Benz Stadium í Atlanta

Það sem gestir sjá á leikdegi í Mercedes-Benz Stadium í Atlanta lítur út eins og vel smurð vél. Á bak við tjöldin ríkir hins vegar stöðug spenna, skipulag í hæsta gæðaflokki og eldhúsrekstur sem fer langt út fyrir ramma hefðbundinna veitingahúsa.

Völlurinn, sem hefur hýst Ofurbikarmót (Super Bowl), tónleika með Beyoncé og Taylor Swift og mun taka á móti leikjum á HM 2026, er stundum notaður tvo daga í röð fyrir stórviðburði. Þá hefst eitt umfangsmesta skipulagsátak sem þekkist í bandarískum veitingageira.

Í nýju myndbandi Business Insider, sem sjá má neðst í frétt, er fylgst með því hvernig yfir 1.000 starfsmenn vinna alla nóttina við að umbreyta vellinum á innan við 18 klukkustundum. Um er að ræða flutning frá úrslitaleik í háskólabolta á laugardagskvöldi yfir í NFL leik á sunnudagseftirmiðdegi þar sem Atlanta Falcons taka á móti meisturum Ofurbikarsins, Seattle Seahawks. Fyrir veitingageirann á vellinum þýðir þetta að allt eldhúskerfið fer í ofurkeyrslu á meðan aðrir hreinsa, mála völlinn og endurraða stúkum.

Eldhúsin á Mercedes-Benz Stadium eru í raun heill veitingabær. Þar eru starfrækt fjölmörg eldhús og sölustöðvar sem saman þurfa að framleiða tugþúsundir skammta á örfáum klukkustundum. Samkvæmt myndbandinu er eldað fyrir allt að 70.000 áhorfendur á leikdegi. Það krefst nákvæmrar áætlun, samhæfingar við birgja og stöðugrar endurnýjunar á hráefni. Matvælaflutningar hefjast snemma á morgni leikdags og flæði vörunnar inn á svæðið þarf að ganga snurðulaust fyrir sig þrátt fyrir að vellinum sé enn verið að umbreyta.

Reksturinn minnir að mörgu leyti á stóran hótelrekstur, nema að allt þarf að gerast hraðar og undir meiri pressu. Yfirmenn eldhúsa þurfa að tryggja að hitastig, geymsluaðstæður og matvælaöryggi haldist í hæsta gæðaflokki þrátt fyrir gríðarlegt magn. Starfsmenn vinna á vöktum alla nóttina við undirbúning, forvinnslu og frágang. Þegar fyrstu sendingar af heitum réttum fara af stað í sölustöðvarnar á leikdegi er lítið svigrúm til mistaka.

Þótt myndbandið fjalli að hluta um hreinsun, málningarvinnu og uppsetningu búnaðar er ljóst að veitingageirinn er einn stærsti og einn viðkvæmasti hlekkur í þessu stóra ferli.

Fyrir gesti er upplifunin einföld. Heitur matur, kaldir drykkir og hraður afgreiðslutími. Fyrir fagfólk í veitingarekstri er þetta hins vegar áhugavert dæmi um hvernig stórviðburðastaðir byggja upp eldhúsrekstur sem þarf að skila stöðugum gæðum fyrir tugþúsundir gesta á stuttum tíma.

Myndband Business Insider dregur fram þá vinnu í bakgrunni sem yfirleitt fer fram fyrir luktum dyrum. Þar kemur skýrt fram hversu mikilvægur veitingareksturinn er fyrir heildarupplifun gesta á stórleikjum og tónleikum. Án skipulagðs eldhúss, öruggra birgðakeðja og vel þjálfaðs starfsfólks væri engin stemning á leikdegi. Þetta er áminning um að á bak við glansmynd stórviðburða stendur veitingageirinn oft í eldlínunni, bókstaflega alla nóttina, til að allt gangi upp þegar hurðirnar opnast.

Myndir: skjáskot úr myndbandi