Banna foie gras á Indlandi

Indland hefur nú, fyrst allra landa, bannað innflutning á foie gras til landsins. Bannið tók gildi þann 3. júlí síðastliðinn og hefur eflaust talsverð áhrif á franska veitingastaði þar í landi, enda algengur réttur í franskri matargerð, að því er fram kemur á dv.is.

Foie gras er franskt gæðapaté sem er ýmist gert úr gæsa- eða andalifur en aðferðin við að útbúa vöruna hefur löngum verið umdeild enda eru fuglarnir neyddir til að borða stanslaust í um þrjár vikur til að lifrin stækki og fitni nógu mikið.  Bannið í Indlandi var sett í kjölfar kvartana frá bresku dýraverndarsamtökunum Animal Equality og er þetta ekki í fyrsta sinn sem heyrist í dýraverndarsinnum vegna framleiðslu foie gras, en mörgum þykir aðferðin við að fita lifur fuglanna helst til ógeðfelld.

Framleiðsla foie gras er nú þegar bönnuð í löndum á borð við Þýskaland, Ítalíu, England og Ísrael en innflutningur hefur þó aldrei verið bannaður fyrr en nú.

Greint frá á dv.is

Mynd: úr safni

/Sverrir