Nýtt bakarí, veitingahús, fisk- og kjötbúð og hótel
Árið 2024 var stórt ár fyrir matgæðinga á KEF
Árið 2024 var stórt fyrir matgæðinga á Keflavíkurflugvelli. Fjöldi nýrra veitingastaða opnaði í samstarfi við góða samstarfsaðila á árinu sem nú er að ljúka.
Flugvöllurinn er í stöðugri þróun en sérstök áhersla hefur verið lögð á að bæta þjónustu við farþega og auka úrvalið í flugstöðinni. Fjöldi nýrra veitingastaða opnaði í samstarfi við góða samstarfsaðila á árinu sem nú er að ljúka. Veitingastaðirnir deila því að hafa allir sérvalið íslenskt hráefni í réttum sínum.
Veitingasvæðið Aðalstræti opnaði við mikla lukku matgæðinga
Veitingasvæðið Aðalstræti opnaði í haust í brottfararsal Keflavíkurflugvallar (KEF). Alls eru þrír nýir veitingastaðir á veitingasvæðinu; hamborgarastaðurinn Yuzu, ítalski veitingastaðurinn La Trattoria og mexíkóski matstaðurinn Zócalo.
Veitingasvæðið er hluti af opnun austurálmunnar sem felur í sér nærri 30% stækkun flugstöðvarinnar. Íslenska hönnunarstofan HAF Studio hannaði nýja veitingasvæðið í austurálmu sem hefur fengið nafnið Aðalstræti. Áhersla var lögð á að skapa heildrænt rými sem heldur vel um gesti og stemningu eins og hún gerist best í miðborg Reykjavíkur.
Með opnun veitingasvæðisins hefur úrval veitingastaða á flugvellinum aukist enn frekar og ættu flest sem þangað sækja að geta fundið sér eitthvað við sitt hæfi.
Hamborgarastaðurinn Yuzu
- Yuzu
- Yuzu – Góður hamborgari fyrir flug
Hamborgarastaðurinn Yuzu er löngu orðinn landsmönnum kunnur en með nýjum veitingastað á Keflavíkurflugvelli eru staðirnir orðnir sex talsins. Matseðillinn er þróaður af stjörnukokkinum Hauki Má Haukssyni og byggist á góðu úrvali alls kyns hamborgara.
Á Yuzu á Keflavíkurflugvelli geta gestir nælt sér í vinsælustu réttina en auk þess er boðið upp á morgunverðarborgara sem er sérstaklega útfærður fyrir flugvöllinn.
Ítalskt góðgæti með áherslu á einfaldleika og gæði
- La Trattoria
- La Trattoria – Maturinn er innblásinn af matarmenningu á Ítalíu
Á La Trattoria er áhersla á einfaldleika og gæði en maturinn er innblásinn af matarmenningu á Ítalíu.
La Trattoria var fyrst opnaður á Hafnartorgi og hefur staðurinn notið mikilla vinsælda meðal matgæðinga. Heiðurinn af matseðlinum á veitingafólkið Hrefna Sætran og Ágúst Reynisson.
Mexíkóskur matur sem kitlar bragðlaukana
- Mexíkóski matstaðurinn Zócalo
- Hollur og ferskur mexíkóskur matur
Zócalo býður upp á hollan og ferskan mexíkóskan mat sem kitlar bragðlaukana. Á matseðli staðarins er meðal annars hágæða burritos, burritos skálar, quesadillas, taco, nachos og salöt.
Zócalo hefur íslenska tengingu en eigandi keðjunnar er Einar Örn Einarsson, sem var annar stofnenda Serrano hér á landi. Þetta er hins vegar fyrsti Zócalo staðurinn þeirra hér á landi.
Loksins sneri aftur sem bar & café
Loksins bar var rekinn á Keflavíkurflugvelli um árabil og opnaði á árinu í breyttri mynd. Auk þess að bjóða upp á fjölbreytt úrval drykkja, líkt og gestir flugvallarins hafa notið síðustu ár, býður Loksins Café & bar upp á vel útfærðan matseðil.
Á boðstólum er ýmist góðgæti á borð við nýbakað handgert bakkelsi á staðnum, morgunverðarskálar, salöt, ferskt ciabatta og aðrir girnilegir heitir réttir.
- Semjon Karopka, yfirkokkur Loksins Café & Bar
- Á boðstólum er ýmist góðgæti í boði, t.a.m. nachos með salsa og heitum rjómaosti
Matreiðslumaðurinn Semjon Karopka, yfirkokkur á veitingastöðunum Pasta í Borg 29 mathöll og Hipstur í Gróðurhúsinu í Hveragerði, hefur tekið við stöðu yfirkokks Loksins Café & bar en hann hefur margra ára reynslu úr veitingageiranum á Íslandi.
KEF Diner bætist við D-hlið
Þá er ekki upptalningunni lokið því á síðustu vikum ársins lýkur framkvæmdum við nýjan veitingastað, KEF Diner, við D-hlið flugstöðvarinnar. Staðurinn sækir innblástur sinn í sögu svæðisins og er með skírskotun til tímans þegar ameríski herinn var í Keflavík á árunum 1951-2006.
Í boði er fjölbreyttur matseðill með áherslu á ameríska matargerð í bland við íslenska rétti.
2024 gefur 2023 ekkert eftir
- Bakað
- Bæjarins beztu pylsur
- Jómfrúin í flugstöðinni
- Veitingastaðurinn Elda
Það er því ljóst að árið sem nú er að ljúka gefur árinu á undan lítið eftir en árið 2023 opnaði meðal annars veitingastaðurinn Jómfrúin í flugstöðinni auk þess sem Bakað, Eldað og Bæjarins beztu pylsur hófu að bjóða upp á góðgæti í flugstöðinni.
Myndir: kefairport.is

-
Viðtöl, örfréttir & frumraun24 klukkustundir síðan
Fermingarundirbúningur í brennidepli – Kynningarsýning í Múlabergi
-
Viðtöl, örfréttir & frumraun14 klukkustundir síðan
Matarveisla í Reykjavík: Stjörnukokkar töfra fram íslenska sælkerarétti
-
Markaðurinn1 dagur síðan
Vantar kokka á hótel Hellnar og hótel Húsavík
-
Markaðurinn23 klukkustundir síðan
Skapandi konfektmeistari óskast
-
Keppni2 dagar síðan
Nýr vettvangur fyrir brauð-sérfræðinga: Heimsmeistaramót brauð-sommelier í fyrsta sinn
-
Markaðurinn1 dagur síðan
Sænsku bollurnar – Semlur
-
Starfsmannavelta3 dagar síðan
Veitingageirinn titrar: Bloomin’ Brands með umfangsmiklar uppsagnir
-
Frétt21 klukkustund síðan
Uber Eats höfðar mál gegn DoorDash vegna meintra einokunaraðferða