Andri Davíð er besti barþjónninn

Andri Davíð fagnar vel og innilega sigrinum í World Class kokteilakeppninni

Andri Davíð Pétursson bar sigur úr býtum í World Class kokteilakeppninni sem fór fram í Hörpu nú á dögunum.  Andri starfar sem veitingastjóri hjá Mat og drykk, en hann mun taka þátt fyrir hönd Íslands í alþjóðlegri úrslitakeppni í Miami í haust.  Á mbl.is kemur fram að keppnin í Miami fer ört stækkandi og í ár eru yfir 60 lönd skráð til leiks.

Keppnisdagurinn var langur hjá Andra og hinum barþjónunum en lokakeppnin stóð yfir frá morgni til kvölds.  Fyrst kepptu barþjónar í þema hafsins í Hvalasafninu og gerðu tvo drykki. Eftir hádegi var þema jarðarinnar í Grasagarðinum þar sem barþjónar gerðu þrjá drykki. Þá var tilkynnt hvaða þrír barþjónar voru efstir til að keppa í Háalofti Hörpu í himinþemanu.

Efstu þrír barþjónarnir kepptu þá í lokakeppninni sem var hraðakeppni. Barþjónar höfðu tíu mínútur til að hrífa dómara og áhorfendur með sér með hraða og frumlegheitum, að því er fram kemur á mbl.is.

Í lokakeppninni kepptu þeir Orri Páll Vilhjálmsson frá Apótekinu og Teitur Ridderman Schiöth frá Slippbarnum á móti Andra.

Greint frá á mbl.is

Mynd: facebook / Matur og Drykkur