Gataklettur kaupir Hótel Stykkishólm

Hótel Stykkishólmur

Pétur Geirsson hefur selt fyrirtækinu Gatakletti ehf Hótel Stykkishólm. Nýir eigendur taka formlega við eignum og rekstri um næstu mánaðamót.

Sverrir Hermannsson einn af hluthöfum Gatakletts segir í samtali við Skessuhorn að þessi kaup fyrirtækisins sé liður í því að efla vöxt þess á Snæfellsnesi, en fyrir rekur Gataklettur nú ferðaþjónustuna Snjófell á Arnarstapa sem það keypti nýverið og Hótel Ólafsvík.

„Við munum fara í einhverjar breytingar á rekstri hótelsins í Stykkishólmi. Við munum skipta um tæki í eldhúsi og mála það.  Þá hyggjumst við hafa hótelið opið lengur.”  Sverrir segir ennfremur að leyfi sé til staðar til að byggja tvær hæðir ofaná hótelið en fyrst um sinn verði beðið með þær framkvæmdir. “Við getum þannig stækkað hótelið um 28 herbergi til viðbótar við þau sem fyrir eru.“