Instagram er góð leið til að ná til íslenskra neytenda | Instagram er næst vinsælasti samfélagsmiðill Íslendinga

Kelloggs fyrirtækið góðkunna greip um helgina til óvenjulegs ráðs til að kynna breytingu sem búið er að gera á uppskriftinni að Special K morgunkorninu. Fyrirtækið nýtti sér mátt samfélagsmiðlanna og opnaði sérstaka pop-up verslun, Instashop, í Kringlunni þar sem gestir og gangandi gátu greitt fyrir morgunkorn með Instagram-mynd.

Þetta er í fyrsta sinn sem þessi óvenjulega leið er farin við markaðssetningu hér á landi, en Kelloggs stóð fyrir samskonar viðburði í Svíþjóð í sumar.
Instashop virkaði þannig að fólk smellti af sér mynd þar sem það hélt á stórum kassa af Special K og birti hana á Instagram með merkingunni #nyttspecialk. Í staðinn fékk það kassa af morgunkorninu. Uppátækið mæltist vel fyrir og fjölmargir komu við í Instabúðinni.

Special K á marga aðdáendur hér á landi, en það er næstvinsælasta morgunkornið á borðum landsmanna. Það var því vel við hæfi að kynna breytinguna á Instagram, en könnun sem gerð var af vefmarkaðsstofunni Hálendið fyrir Kelloggs sýndi að Instagram er næstvinsælasti samfélagsmiðillinn á Íslandi, að því er fram kemur í fréttailkynningu.

Helstu niðurstöður könnunar um samfélagsmiðlanotkun Íslendinga

Í nýrri könnun sem vefmarkaðsstofan Hálendið gerði fyrir matvælaframleiðandann Kelloggs kemur í ljós að Instagram er næst vinsælasti samfélagsmiðill Íslendinga. Hátt í 400 manns svöruðu könnuninni.

Facebook trónir sem fyrr á toppnum. Twitter, samskiptamiðill sem byggir á stuttum textaskilaboðum og hefur náð miklum vinsældum víða um heim, virðist ekki hafa slegið jafn duglega í gegn hér á landi.

Samfélagsmiðlar sem gera notendum kleift að deila ljósmyndum og myndböndum virðast höfða vel til Íslendinga.

• 39% aðspurðra í könnuninni sögðust opna Instagram að minnsta kosta einu sinni á dag.
• En á móti voru aðeins 20% sem opna Twitter
• og aðeins 9% sem opna Linkedin.
• Í könnuninni kemur einnig fram að Snapchat nýtur mjög vaxandi vinsælda. (28% aðspurðra var með forritið í símanum sínum)

Í könnuninni var einnig spurt um viðhorf fólks til ýmissa samskiptamiðla

• 81% sögðu að Facebook og Instagram væri góð leið til að miðla eigin lífi.
• 82% sögðu að notkun þessara tveggja samskiptamiðla skapi aukna nánd í samskiptum við vini og ættingja.
• 77% sögðu þá vera góða leið til að mynda ný tengsl
• 94% sögðu þá nýtast við að viðhalda tengslum.
• 35% segja þessa tvo samskiptamiðla vera hentugt hjálpartæki í makaleit.

Myndir: Aðsendar

/Smári

Taggaðu okkur á Instagram: #veitingageirinn og myndirnar birtast sjálfkrafa á forsíðunni.