Gestakokkur á Nauthól | „…þetta var virkilega ánægjuleg kvöldstund á Nauthól“

F.v. Ragnar Guðmundsson matreiðslumaður – vaktstjóri, Ari Posocco yfirmatreiðslumaður og Victor Holm Gestakokkur frá Gautaborg

Í tilefni af konudeginum s.l. þá breytti veitingastaðurinn Nauthóll aðeins til og fengu til sín gestakokkinn Victor Holm. Hann kom frá hinum geysivinsæla Barabicu Pan American Grill í Gautaborg og hefur m.a. starfað áður á tveimur af bestu veitingastöðum í borginni, Michelin-staðnum Thörnströms Kök og hinum heimsfræga Linnéa Art Restaurant.

Matreiðslumenn Nauthóls og Holm buðu upp á glæsilegan matseðil að þessu tilefni þar sem ný-norrænir straumar ráða ferð og íslenska lambið og hekluborri fá meðal annars að njóta sín.

Matseðillinn var eftirfarandi:

Lystauki
Hörpuskel í einiberjasítrusvinaigrette, eplasellerírótargel og gúrkur

Svolítið sérstakur, en frískandi og mildur

Forréttur.
Hægeldaður hekluborri (tilapia) sætkartöflumauk, steiktir sveppir, fenell, kerfilolía og humargljái

Ekki sá fallegasti, en yndisleg eldun á fiskinum og meðlæti sómaði sér vel með.

Aðalréttur
Steikt lambafille og hægeldaður rifinn lambaskanki í brickdeigi, steiktar kartöflur, sýrðir perlulaukar, grænkál og rauðbeðugljái

Þetta er sá albesti lambaréttur sem ég hef smakkað á ævinni, skankinn í brickdeiginu var á heimsmælikvarða, skemmtilegt útspil með grænkálið.

Eftirréttur
Bakað mjólkursúkkulaði með kardimommuís og eplum

Enn og aftur komu þeir okkur á óvart, þessi var svakalega góður og gaf aðalréttinum lítið eftir.

Þjónustan var frábær og staðnum til mikils sóma, þetta var virkilega ánægjuleg kvöldstund á Nauthól og ef þessi Svíi kemur aftur þá er ég mættur.

Takk fyrir okkur.

/Sverrir