Vildu ekki launalækkun og fengu uppsagnarbréf

Borgartún 21

Hundruð opinberra starfsmanna sniðgengu mötuneytið í Borgartúni 21 í dag til þess að sýna samstöðu með tveimur konum sem störfuðu í mötuneytinu en var sagt upp á dögunum þar sem þær sættu sig ekki við launalækkun upp á tugi þúsunda. Í hádeginu á venjulegum miðvikudegi snæða yfir hundrað manns í mötuneytinu en þegar blaðamaður DV leit þar við í hádeginu í dag voru ekki fleiri en tíu að fá sér að borða.

Í Borgartúni 21 hafa fjölmargar stofnanir aðsetur eins og Barnaverndarstofa, Þjóðskrá Íslands, Hagstofa Íslands, Neytendastofa, Íbúðalánasjóður, Ríkissáttasemjari, Yfirskattanefnd og Fjölmiðlanefnd.

Mötuneytið er rekið af fyrirtækinu ISS sem sérhæfir sig í slíkum rekstri en samkvæmt heimildum DV spurðist það fljótt út um húsið þegar konunum var sagt upp. Af því tilefni ákváðu yfir hundrað starfsmenn að snæða annars staðar í hádeginu í dag og þannig mótmæla þeirri ákvörðun ISS að segja þeim upp. Konurnar höfðu starfað í mötuneytinu í þó nokkurn tíma og voru þekktar fyrir frábæra þjónustulund á meðal starfsmanna í húsinu, að því er fram kemur á dv.is.

Nánari umfjöllun er hægt að lesa á vef dv.is með því að smella hér.

Mynd: skjáskot af google korti.