Upprunamerking Icelandic Lamb – Samstarf við veitingahús skilar árangri

Hafliði Halldórsson

Hlutverk markaðsstofunnar Icelandic Lamb er að markaðssetja íslenskt lambakjöt til erlendra ferðamanna og á háendamörkuðum erlendis. Uppbygging og kynning á merki Icelandic Lamb hefur farið vel af stað og hefur þekking ferðamanna sem og Íslendinga á merkinu farið langt fram úr björtustu vonum. Í dag eru 180 íslenskir veitingastaðir í samstarfi við Icelandic Lamb, en tilgangur og markmið samstarfsins er að stuðla að því að íslensku lambakjöti verði skapaður frekari sess sem hágæða matvöru, með kynningu á og notkun merkis Icelandic Lamb.

Samkvæmt könnun Gallup sem framkvæmd var fyrir Icelandic Lamb í nóvember síðastliðnum þekkja 38% erlendra ferðamanna merki Icelandic Lamb. 70% þeirra muna eftir því að hafa séð skjöld Icelandic Lamb á veitingastað á meðan á Íslandsdvölinni stóð og er lambakjötið einnig sú íslenska afurð sem flestir ferðamenn segjast hafa prófað í heimsókninni. Þessi viðamikla þekking vekur eftirtekt þar sem markhópurinn endurnýjar sig hratt og meðaldvöl ferðamanna á könnunartímanum er skammur. Þessi þekking ferðamanna á merkinu skapar einnig tækifæri fyrir þá veitingastaði sem nýta það og þá sameiginlegu markaðssetningu sem að baki stendur.

Það er mikilvægt að halda áfram að nýta samstarfið við veitingastaði til þess að tryggja að skilaboð Icelandic lamb skili sér til erlendra ferðamanna. Með samstarfinu styrkja veitingastaðir eigin sérstöðu, því að geta sagt sögur af hráefni og hefðum fylgir veigamikill ávinningur fyrir veitingamenn sem magna upp upplifun gesta og þar af leiðandi virði sinar þjónustu. Með því að bæta upplifum ferðamanna leggja veitingamenn sauðfjárbændum og allri virðiskeðju lambakjötsins lið enda eru þeir í lykilstöðu til þess að koma boðskap Icelandic Lamb til skila.

Kröfuharðir neytendur gera nú vaxandi kröfur til upprunamerkinga á matvæli í verslunum og á veitingastöðum. Með notkun á merki Icelandic Lamb koma veitingastaðir til móts við þann stækkandi hóp neytenda, en merki Icelandic Lamb auðkennir hágæðavörur úr íslensku lambakjöti.

Næstu skref í starfi Icelandic Lamb eru bæði þörf og mikilvæg. Með auknum innflutningi á fersku kjöti er mikilvægt að standa vörð um markaðsstöðu íslenska lambakjötsins og aukin notkun upprunamerkis er liður í þeirri vinnu. Þá er aukning á sölu á öðrum bitum en hryggjum stöðugt til skoðunar og spila veitingastaðir veigamikinn þátt í því verkefni. Með aukinni viðleitni og vöruþróun geta veitingastaðir aukið nýtingu og virði minna þekktra bita. Markaðsstofan Icelandic Lamb mun áfram styðja við nýsköpun veitingastaða við framreiðslu á íslensku lambakjöti með og tryggja að samstarfsveitingastaðir hafi einungis hágæða íslenskt lambakjöt á matseðlum sínum.

Hafliði Halldórsson

Höfundur er framkvæmdastjóri markaðsstofunnar Icelandic Lamb.