Snæbjörn sigraði í frönsku keppninni Mondial des Chefs – Vídeó

Snæbjörn Kristjánsson með íslenska fánann

Snæbjörn með vinnings aðalréttinn; Lambakótelettur í kryddjurtaraspi

Snæbjörn Kristjánsson sigraði í matreiðslukeppninni Mondial des Chefs sem fram fór í París í Frakklandi í dag.

Þar fór fram matreiðslukeppni milli matreiðslumanna sem starfa í opinberum eldhúsum, skólum, stofnunum og mötuneytum.

Keppendur þurftu að elda fyrir 10 manns, Lambahrygg í aðalrétt og eftirrétt þar sem möndlur áttu að vera í aðalhlutverki.

Úrslitin voru:

1. sæti – Ísland, Snæbjörn Kristjánsson
2. sæti – Frakkland, Ghislain Moureaux
3. sæti – Indland, Shehrezad Kapadia

Vinningsmatseðillinn hjá Snæbirni var:

Lamb á 2 vegu. Lambakótelettur í kryddjurtaraspi og léttsteikt lambafille með lerkisveppa-byggotto, sætum kartöflum, aspas og soðsósu. Volg hindberjakaka með fullt af möndlum, hunangsrjóma, hindberjasósu og súkkulaðikremi.

Freisting heyrði í Snæbirni þegar úrslitin voru klár og var hann að vonum ánægður með sigurinn og hversu vel gekk. Sérstaklega var gaman að sigra Frakkana á heimavelli sagði hann.

Myndband frá keppninni:

Verðlauna Uppskriftir

Með fylgja uppskriftir af verðlaunaréttunum:

Lambahryggur með íslensku bankabyggi og íslenskum lerkisveppum

Fyrir 10 manns

• 3 kg lambahryggur
• 300 g bankabygg
• 200 g lerkisveppir
• 100 g skalottlaukur
• 1 l lambasoð
• 200 ml rjómi
• 100 ml hvítvín
• 50 g hvítlaukur
• 200 g panko brauðraspur
• 50 g timian
• 50 g steinselja
• 50 g basil
• 3 egg
• Salt og pipar
• 4 sætar kartöflur
• 1 bökunarkartafla
• 30 kirsuberjatómatar
• 30 smá aspas
• 20 perlulaukar
• 100 g smjör

Aðferð

1. Úrbeinið lambahrygginn, búið til kótilettur og fituhreinsið restina af fillet-inu.
2. Sjóðið bankabyggið í 45 mínútur og geymið til hliðar.
3. Skerið sætu kartöfluna í teninga og bakið í olíu við 120°C í 30 mínútur.
4. Búið til kartöflumús úr bökunarkartöflunni og sprautið ræmu á sætu kartöfluna.
5. Eldið tómatana, aspasinn og perlulaukinn, og raðið ofan á sætu kartöfluna.
6. Steikið skalottlaukinn, sveppina, og hvítlaukinn í potti, setjið hvítvín og rjóma út á og síðan byggið, látið sjóða í ca. 5 mínútur.
7. Þykkið lambasoðið og bragðbætið með smjöri og salti og pipar.
8. Búið til kryddjurtaolíu úr steinseljunni, timianinu, basilinu og olíunni, setjið kryddjurtaolíuna út í raspinn og pannerið kótiletturnar upp úr eggjunum og kryddjurtaraspinum, steikið þær á pönnu, ásamt fillet-inu.
9. Bakið lambið í ofni, ásamt sætu karöflunni, og setjið á diska ásamt bygginu og sósunni

Hindberja-möndlubaka með hunangsrjóma

Fyrir 10 manns

Botn:

• 225 g hafrakex
• 50 g kókosmjöl
• 25 g súkkulaðispænir
• 50 g smjör
• 50 g púðursykur
• 2 teskeiðar kanill

Deig:

• 250 g smjör
• 250 g flórsykur
• 250 g möndluflögur
• 4 egg
• 50 g hveiti
• Börkur af einni sítrónu

Sett ofan á:

• 1 kg hindber
• 300 ml rjómi
• 50 g hunang
• 200 g súkkulaðikrem (nutella)
• 50 g flórsykur

Aðferð:

1. Búið til botninn og setjið í botninn á skálunum.
2. Búið til deigið og sprautið ofan á botninn í skálunum. Setjið 6 hindber ofan á.
3. Bakið skálarnar í 180 gráðu heitum ofni í 14 mínútur.
4. Búið til hindberjasósu úr hindberjum og flórsykrinum.
5. Þeytið rjómann og bragðbætið með hunangi og kanil.
6. Setjið skálarnar á diska og skreytið með hindberjasósunni, hunangsrjómanum, súkkulaðikremi og hindberjum.

Myndir: aðsendar