Sex íslenskir veitingastaðir taka þátt í frönsku matarmenningarhátíðinni

GOÛT DE FRANCE / GOOD FRANCE er matamenningarhátíð sem haldin verður 21. mars næstkomandi um allan heim, þar á meðal í Reykjavík.

Hátíðin er nú haldin í þriðja skipti til að vekja athygli á sköpunarkrafti og kostum franskrar matargerðar og grunngildunum hennar: Samneyti við aðra, matarnautn, virðingu fyrir vel gerðum mat, fyrir náunganum og fyrir jörðinni.

Á matseðlinum eru fordrykkir, snittur, forréttur, aðalréttur og síðan ostar og eftirréttir ásamt frönskum létt- og kampavínum. Sífellt fjölgar veitingastöðunum sem taka þátt í hátíðinni. Í fyrra voru þeir 1.715 í 150 löndum en verða að þessu sinni 2.000 talsins í fimm heimsálfum.  Miðað við höfðatölu verður vafalítið hvergi meiri þátttaka en á Íslandi: Sex valinkunnir veitingastaðir bjóða matseðla undir merkjum hátíðarinnar í ár.

• Gallery Restaurant á Hótel Holti (Friðgeir Ingi Eiríksson)
• Kitchen & Wine á 101 Hótel (Hákon Már Örvarsson)
• Le Bistro (Rémi Orange)
• Snaps (Númi Tómasson)
• Torfan humarhúsið (Ívar Þórðarson)
• AAlto Bistro í Norræna húsinu 22. mars (Sveinn Kjartansson)

Skipuleggjendur hátíðarinnar leggja áherslu á menntun í veitingahúsa- og hótelfræðum og því verða það nemar í Hótel- og matvælaskóla Menntaskólans í Kópavogi sem sjá um að matbúa og framreiða hátíðarkvöldverð fyrir gesti franska sendiherrans í embættisbústað hans þetta kvöld.

Mynd: france.fr / Good France 2017