Naomi Campbell vildi ekki tómata og skinku

Breska fyrirsætan Naomi Campbell hefur oft átt í erfiðleikum með að hemja skap sitt og það hefur valdið henni ýmsum vandræðum. Enn á ný er Naomi komin í fréttirnar vegna skapsins en breska blaðið The Sun segir, að hún hafi gengið berserksgang um borð í skemmtisnekkju, sem er í eigu Badr Jafars, nýs kærasta fyrirsætunnar.

Eru skemmdirnar á snekkjunni metnar á fjórðu milljón íslenskra króna.

Að sögn blaðsins var ætluðu þau Naomi og Jafar að snæða rómantískan kvöldverð um borð í snekkjunni, þar sem hún lá við bryggju í Viareggio á Ítalíu. Ítalskur matreiðslumaður, sem fenginn var til að sjá um máltíðina, bar tómata með mossarellaosti og vindþurrkaðri skinku á borð fyrir parið ásamt flösku af héraðsvíni. Þetta þótti Naomi hins vegar ekki merkilegur matur og bað um að honum yrði fleygt fyrir borð. Kokkurinn svaraði fyrir sig með nokkrum vel völdum orðum krydduðum svívirðingum á ítölsku og það var meira en Naomi þoldi. Að sögn The Sun átti áhöfn snekkjunnar fótum fjör að launa því fyrirsætan fleygði leirtaui og öðru lauslegu í allar áttir.

„Það varð allt vitlaust. Það eina sem heyrðist voru hróp og köll á ensku og brothljóð. Nokkrir úr áhöfninni sögðu að eldhúsið í snekkjunni væri í rúst og gluggatjöld hefðu verið rifin niður og púðar rifnir í tætlur,“ hefur The Sun eftir manni, sem var á bryggjunni.

Greint frá á Mbl.is

[email protected]