Miklar framkvæmdir í Fiskbúð Fjallabyggðar – Valgerður: „Endurnýjuðum í rauninni allt í vinnslunni.“

Hákon Sæmundsson matreiðslumaður.
Vinnslan í fiskbúðinni verður öll endurnýjuð.

Miklar framkvæmdir standa yfir í Fiskbúð Fjallabyggðar sem staðsett er við Aðalgötu 27 á Siglufirði. Eigendur fiskbúðarinnar, eru þau Valgerður Þorsteinsdóttir og Hákon Sæmundsson matreiðslumaður.

„Árið 2019 byrjuðum við á framkvæmdum og tókum búðar hlutann í gegn.  Áætlað var að taka vinnslu hlutann árið 2020, en eins og flestir muna þá skall covid-ið á og framkvæmdum var frestað þar til nú í ár.“

Sagði Valgerður Þorsteinsdóttir í samtali við veitingageirinn.is.

Sjá einnig (Frétt frá: 30. júní 2019): Fiskbúðin í Fjallabyggð opnuð á ný eftir töluverðar breytingar

Allt vinnslugólfið var brotið upp og jafnað. Frystirinn og kælirinn frá miðri síðustu öld fengu hvíldina góðu og nýir „walk-in“ kæli-, og frystiklefi frá Verslunartækni komnir í staðinn.

„Endurnýjuðum í rauninni allt í vinnslunni.“

Sagði Valgerður.

Opnunin seinkaði aðeins, en áætlað var að opna nú um miðjan júní en framkvæmdirnar voru meiri en ætlað var.  Áætlað er að opna í kringum mánaðarmótin júní/júlí.

Opnunartíminn verður mán. – föst. frá klukkan 11 til 17 og verður einnig opið um helgar ef veður leyfir og þegar hátíðir eru í bænum.  Fiskbúðin býður upp á glæsilegt fiskborð og klassíska breska réttinn Fish & chip sem hægt er að borða á staðnum eða í „Take away“.

Mynd: Smári / Veitingageirinn.is