Kristján Örn matreiðslumeistari bauð upp á glæsilegt jólahlaðborð á Gran Canaria – Myndir

Kristján Örn Frederiksen

Í gær, sunnudaginn 14. desember, var haldið glæsilegt jólahlaðborð á veitingastaðnum Why Not Lago á Gran Canaria, þar sem tæplega 200 gestir komu saman til að eiga notalega stund og njóta vandaðra kræsinga í góðum félagsskap. Að sögn trolli.is ríkti einstaklega góð stemning alla kvöldstundina og var augljóst að gestir kunnu vel að meta bæði aðbúnað og framsetningu.

Veisluborðið svignaði undan kræsingum og var það matreiðslumeistarinn Kristján Örn Frederiksen sem sá um eldamennsku og framsetningu á jólahlaðborðinu, ásamt öflugu og samstilltu starfsfólki eldhússins. Kristján Örn lærði matreiðslufræðin á Hótel Sögu og útskrifaðist þaðan sem matreiðslumaður vorið 1981. Reynslan og fagmennskan leyndu sér ekki, enda var maturinn bæði fallega fram borinn og afar bragðgóður.

Guðbjörg Bjarnadóttir, sem rekur Why Not Lago, stóð að skipulagningu viðburðarins af miklum myndarbrag. Hún sá jafnframt um söng á ballinu sem tók við eftir borðhald og setti skemmtilegan svip á kvöldið. Um tónlistina sá Pétur Hreinsson, sem margir þekkja fyrir störf sín með hljómsveitinni Hafrót, og hélt hann uppi góðri stemningu fram á kvöld.

Á jólahlaðborðinu var boðið upp á fjölbreyttan og glæsilegan matseðil sem var eftirfarandi:

Forréttir
Marineruð síld með lauk og kúmeni
Mild chilli mayo síld, jólasíld
Karrí síld
Graflax með sinnepsdillsósu
Reyktur lax og hrærð egg
Sveitapaté, innbakað

Aðalréttir
Lax með mangógljáa
Hangikjöt
Pottéttur
Reykt grísakjöt, hamborgarhryggur
Purusteik

Eftirréttir
Ris a la mande
Trippel súkkulaði

Jólahlaðborðið á Why Not Lago var í alla staði vel heppnaður viðburður þar sem matur, tónlist og stemning mynduðu fallega heild. Fleiri myndir frá veislunni má skoða á trolli.is.

Meðfylgjandi myndir eru birtar hér með góðfúslegu leyfi trolli.is.