Kristinn Gísli með PopUp á Sauðá

Kristinn Gísli Jónsson

Dagana 14. – 15. júlí heimsækir Kristinn Gísli Jónsson veitingastaðinn Sauðá í Sauðárhlíð á Sauðárkróki og mun bjóða upp á glæsilegan sex rétta matseðil þar sem skagfirskt hráefni er í hávegum höfð.

Kristinn starfar við matreiðslu í Noregi, nú síðast á Michelin veitingastaðnum Speilsalen í Þrándheimi. Hann hefur náð langt í hinum ýmsu keppnum. Kristinn hreppti silfur í Norrænu nemakeppninni árið 2017 sem haldin var í Helsinki í Finnlandi í Hótel og matvælaskólanum þar í landi. Kristinn Gísli lenti í 10. sæti af 23 keppendum í EuroSkills – evrópukeppni iðn- og verkgreina í Búdapest í Ungverjalandi árið 2018.

Hinrik Lárusson og Kristinn Gísli Jónsson sigruðu í alþjóðlegri matreiðslukeppni í Grikklandi árið 2019 og Kristinn var meðlimur íslenska Kokkalandsliðsins þegar liðið hreppti 3. sæti á Ólympíuleikunum landsliða í matreiðslu sem haldið var í Stuttgart í Þýskalandi árið 2020.

Kristinn náði 2. sætið í Kokkur ársins nú í ár.

Í maí sl. tóku nýir eigendur við Sauðá, þau feðginin Jón Daníel Jónsson matreiðslumeistari og Sandra Björk Jónsdóttir og Alda Kristinsdóttir.  Svona til gamans getið þá er Jón Daníel faðir Kristins Gísla.

Matseðillinn sem að Kristinn býður upp á veitingastaðnum Sauðá:

Skagfirskar rækjur, rabbabari og rós

Reyktur silungur, soðbrauð, piparrót og sítróna

Tómatar frá Laugarmýri, Feykir, graslaukur og pipar

Þorskur, hvítvín, gúrka og dill

Lamba hryggvöðvi, kartöflur, bláber og smjör

Þeyttur rjómi, mysa, marengs og ber

Hægt er að panta borð í síma 833-7447.

Mynd: kokkalandslidid.is