Japansk-íslenska viðskiptaráðið og Fiskmarkaðurinn halda fyrstu sake-hátíðina á Íslandi

Japanskt hrísgrjónavín nýtur sífellt meiri vinsælda um heiminn. Fram til þessa hefur lítið sem ekkert fengist af þessari merku framleiðslu hér á landi en nú hefur orðið þar breyting á svo um munar.

Nú ætlar Japansk-íslenska viðskiptaráðið og Fiskmarkaðurinn að halda sake-hátíð, en ekki er vitað um að slík hátíð hafi verið haldin hér áður á Íslandi.

Hátíðin verður haldin miðvikudaginn 10. maí og hefst herlegheitin klukkan 18:15.

Á Fiskmarkaðnum er nú hægt að komast í sake frá nokkrum af fremstu framleiðendum Japans en allir eiga þeir það sameiginlegt að vera fastagestir á vínseðlum veitinghúsa í Evrópu og Bandaríkjunum sem bjóða upp á stórkostlegar matarparanir við japanskt sake.

Rei Suzuki

Gestur hátíðarinnar verður Rei Suzuki, japanskur víngerðarmaður sem haslað hefur sér völl í evrópskri víngerð á síðustu árum. Hann starfar í Þýskalandi fyrir hina fornfrægu víngerð Koehler-Ruprecht í Kallstadt. Samhliða þeim störfum hefur hann kynnt og aukið hróður japanskrar vínmenningar í Þýskalandi.

Yfir sjö rétta kvöldverði mun hann kynna til sögunnar sjö ólík sake sem hafa verið sérvalin til þess að parast frábærlega með fersku hráefni og óviðjafnanlegri matargerð Hrefnu Sætran og hennar fólks á Fiskmarkaðnum en staðurinn hefur fyrir löngu fest sig í sessi sem helsti merkisberi japanskrar matarmenningar hér á landi.

Sake-hátíðin – Miðvikudaginn 10. maí

Dagskráin hefst á þriðju hæð Fiskmarkaðarins (Uppi bar) kl. 18:15 þar sem verður dreypt á dýrindis kampavíni frá Philipponnat. Að fordrykk loknum, kl. 19:00, verður sest að borðum á Fiskmarkaðnum hvar hvert stórkostlegt sake-vínið leiðir annað og rennur saman við ostrur, sushi og annað góðgæti úr eldhúsi staðarins.

Matseðill er glæsilegur eins og sjá má hér að neðan:

Kampavíns fordrykkur á Uppi

Hörpuskel
– Reykt þorskhrogn, kampavínsvínagretta

2021 Kuheiji EAU DU DÉSIR Junmai Dai Ginjo

Gullsporði
– trufflu dressing

Matsunotsukasa Kimoto Junmai

Eldfjalla humarmaki
– humartartar með 7 spice kryddi og chili

Matsunotsukasa Raku Junmai Ginjo

Ostrur
– yuzu dressing

Tyokuni Sparkling

Kóngarækju tempura
– í tempuradeigi með yuzu jalapeno dressingu

2018 Noguchi Naohiko Sake Institut Yamahai Miyamanishiki

Stórlúða
– greipaldin chimichurri og stökkum kartöflustráum

Zaku Impression H Junmai

Volg súkkulaðikaka
– jarðarber og ís

Noguchi Naohiko Sake Institut 2019 Honjozo

Verð: 35.000 kr. á mann.

Í boði eru 4, 6 og 8 manna borð og borðapantanir eru hjá: [email protected]

Facebook viðburður hér.