Ísland vinnur silfurverðlaun í „Nordic Chef Junior“ keppninni

Keppendurnir Rúnar Pierre Heriveaux, Atli Þór Erlendsson, Natascha Elisabet Fischer og Jóhannes Steinn Jóhannesson dómari
Mynd: tók Sveinbjörn Úlfarsson

Í dag kepptu þrír íslenskir fagmenn í matreiðslu og framreiðslu um Norðurlandameistaratitla í faggreinunum í Álaborg í Danmörku.

Rúnar Pierre Heriveaux varð í öðru sæti í Nordic Chef Junior.

Í flokki ungkokka „Nordic Chef Junior“ vann Rúnar Pierre Heriveaux frá Lava Bláa Lóninu til silfurverðlauna.  Martin Trana Flak frá Noregi sigraði í keppninni.  Aðrir íslensku keppendanna komust ekki í verðlaunasæti en stóðu sig gríðarlega vel í harðri keppni, að því fram kemur í fréttatilkynnningu frá Klúbbi Matreiðslumeistara.

Rúnar Pierre er 21 árs gamall og matreiðslunemi í Lava Bláa Lóninu. Hann var valinn matreiðslunemi ársins 2013 og varð í fjórða sæti í norrænu nemakeppninni 2014. Rúnar Pierre var aðstoðarmaður í Bocuse d´Or keppninni 2015.

Ég er ánægður með frammistöðuna og hvernig ég framkvæmdi allt eftir plani og hafði skipulagt á æfingum síðustu mánuði en hefði auðvitað viljað ná toppsætinu, tek það bara næst.

Sagði Rúnar hress.

Í „Nordic Chef“ þar sem Atli Þór Erlendsson frá Grillinu keppti sigraði sænski keppandinn Eddy Karlsson.

Natascha Elisabet Fischer frá veitingastaðnum Kopar keppti í framreiðslu í „Nordic Waiter“ keppninni en þar sigraði danski keppandinn Heine Egelund.

Atli Þór er 27 ára gamall matreiðslumaður í Grillinu á Hótel Sögu og handhafi titilsins „Matreiðslumaður ársins“ þar sem hann sigraði í keppninni í mars síðastliðnum. Atli Þór var nýlega valinn  í Kokkalandsliðið.

Natascha Elisabet er 28 ára gömul og er framreiðslumaður á Kopar. Hún hefur keppt í ýmsum kokteilkeppnum og varð í 2. sæti í Food & Fun keppninni 2014.

Í dómnefndinni fyrir kokkakeppnirnar í sat Jóhannes Steinn Jóhannesson sem er sjálfur þrautreyndur keppnismaður í matreiðslu og er í Kokkalandsliðinu.

Úrslit í Nordic Young Chef:
1. sæti – Martin Trana Flak, Noregi
2. sæti – Rúnar Pierre Heriveaux, Íslandi
3. sæti – Ludwig Tjørnemo, Svíþjóð

Úrslit í Nordic Chef:
1. sæti – Eddy Karlsson, Svíþjóð
2. sæti – Christian Andre Pettersen, Noregi
3. sæti – Heikki Liekola, Finnland

Úrslit í Nordic Waiter:
1. sæti – Heine Egelund, Danmörk
2. sæti – Thomas Pedersen, Noregur
3. sæti – Michaela Sarfati, Svíþjóð

Myndir: Klúbbur Matreiðslumeistari