Hooters hverfur jafnt og þétt af veitingamarkaðnum – Keðjan hefur nú lokað 30 veitingastöðum til viðbótar

Allt reynt til að bjarga rekstrinum – Hooters reynir að lokka næturgesti með afslætti á smáréttum og köldum bjór í herferðinni Night Owl. Veitingastaðir keðjunnar bjóða nú hálfvirði eftir kl. 22 alla virka daga í von um að halda lífi í kvöldsölunni.

Bandaríska veitingahúsakeðjan Hooters hefur lokað tugum staða víðs vegar um Bandaríkin eftir að móðurfélagið sótti um gjaldþrotaskipti fyrr á árinu. Lokanirnar, sem ná til um 30 staða, eru hluti af stærri endurskipulagningu sem miðar að því að bjarga vörumerkinu í breyttum neysluheimi, að því er fram kemur á fréttavefnum The Sun.

Sjá einnig: Gjaldþrot Hooters: Eftir 40 ár á toppnum er framtíðin óviss

Á undanförnum vikum hefur keðjan, sem er hvað þekktust fyrir sportbarstemmningu sína og umdeildan klæðnað þjónustufólksins, lokað án fyrirvara veitingastöðum í ríkjum á borð við Flórída, Texas, Michigan, Georgíu, Norður- og Suður-Karólínu og Tennessee. Engin formleg yfirlýsing fylgdi lokununum, en staðfest er að þær séu afleiðing fjárhagsvanda Hooters.

Umdeild ímynd og breyttar kröfur neytenda

Hooters hefur lengi verið þekkt fyrir markaðsstefnu sem ýtir undir kynferðislega ímynd, en í breyttu samfélagslegu landslagi hafa sífellt fleiri gagnrýnt þessa nálgun. Keðjan reyndi á síðustu árum að endurnýja ímynd sína með svokallaðri „re-Hooterization“ herferð sem fól í sér fjölskylduvænni ásýnd, bætt þjónustugæði og tilraun til að höfða til breiðari markhóps.

Þessar breytingar dugðu þó skammt. Á meðan aðrar keðjur í veitingabransanum náðu að fóta sig eftir heimsfaraldurinn, tókst Hooters ekki að laga sig að breyttum aðstæðum – meðal annars vegna aukins samkeppnismarkaðar, hærri hrávöruverðs og minni neysluhyggju meðal yngri kynslóða.

Sjá einnig: Hooters sækja um greiðslustöðvun og selja reksturinn

Frá gjaldþroti til nýrrar framtíðar?

Í mars 2025 sótti móðurfélag Hooters um gjaldþrotaskipti í Bandaríkjunum og viðurkenndi yfir 600 milljóna dollara skuldir. Á sama tíma var tilkynnt að stefnt væri að því að selja alla 150 veitingastaðina til hóps reyndra rekstraraðila – þar með talið upprunalega stofnendur keðjunnar – og breyta Hooters alfarið í alþjóðlega „franchise“-keðju.

Markmiðið með þessum breytingum er að hagræða rekstri, sníða af óhagkvæmni og veita nýjum rekstraraðilum svigrúm til að laga staðina að staðbundnum markaði.

Hluti stærri þróunar í veitingageiranum

Keðjur á borð við TGI Fridays, Red Lobster og Buca di Beppo hafa allar þurft að loka fjölda staða undanfarið eða leita sér verndar gegn kröfuhöfum. Samkvæmt nýrri skýrslu Technomic um 500 stærstu keðjur í Bandaríkjunum jókst sala aðeins um 3% á síðasta ári, sem er minna en verðbólga í matvælum, og telst það veikasta vaxtarskeið síðan heimsfaraldurinn skall á.

Arfleifð og aragrúi áskorana

Hooters var stofnað árið 1983 í Clearwater, Flórída, og naut fljótt mikillar athygli fyrir óhefðbundna nálgun sína. Keðjan varð að menningarlegu fyrirbæri – og jafnvel tákni ákveðins tíma og gildismats – en hefur í seinni tíð staðið frammi fyrir ásökunum um kynbundna mismunun, óviðeigandi vinnuumhverfi og brot á jafnréttislögum. Tilraunir til ímyndarbreytinga hafa verið misvel heppnaðar, en rekstraraðilar vonast nú til að aðskilja vörumerkið frá umdeildri arfleifð þess með því að færa það í hendur nýrra aðila.

Hvað tekur við?

Þrátt fyrir erfiða stöðu virðist sem að ákveðin von sé bundin við framtíð Hooters sem alþjóðlegrar keðju rekinni í gegnum einkarekna staði. Hvort sú þróun dugi til að bjarga keðjunni úr lægð og endurheimta traust viðskiptavina á nýjan leik, mun tíminn leiða í ljós.

Mynd: hooters.com