Goðsögnin Sverrir Halldórs

Sverrir Þór Halldórsson matreiðslumeistari

Goðsögnin Sverrir Halldórs hefur alið manninn erlendis í sumar, nánar tiltekið í Prag.  Hann hefur verið æðiduglegur að senda okkur ferðasögur af ferðum sínum á merkverða staði, bæði sögulega staði sem og veitingastaði.  Enn hver er maðurinn?

Til er ógrynni af sögum um Sverri, sem því miður fæstar eru prenthæfar.  Setningar eins og: „Má ég reka hann?“, „Stattu upp áður enn að einhver stígur á þig“ og „Helvítis Hor-kók“ eru setningar sem flestir þekkja.  Þessar sögur eru eins og eðalrauðvín, batna bara með árunum.

Hér verður stiklað á stóru varðandi nemahrellirinn.

• Fyrst ber að nefna að Sverrir náði þeim áfanga að verða fimmtugur þann 2. maí sl.
• Hann situr í stjórn Klúbbs matreiðslumeistara og klúbburinn hefur veitt honum Gordon Bleu orðuna.  Hann er þar að auki virkur í MATVÍS og situr í Nemaleyfisnefnd.
• Hann var meðlimur í landsliði í matreiðslu árin 1990-1992 sem keppti í Luxembourg og Chicago.
• Hann nam fræðin sín á Hótel Sögu árin 1974 til 1978.
• Þaðan hélt hann til Lundúnarborgar á Hótel Savoy sem Chef de Partie og var þar frá 1979 til 1980.
• Sama ár var förinni haldið til Danmerkur á Hótel Trouville í Hornbæk og nú sem Sous Chef.
• Árið 1981 gerðist hann veitingastjóri á Bonaparte Club í Kaupmannahöfn.
• 1982 til 1984 lærði hann Hótelstjórnun í Tækniháskólanum í Álaborg.
• 1984 var haldið heim á leið og gerðist hann aðstoðaryfirmatreiðslumaður á hótel Sögu.
• 1987 var Sverrir yfirmatreiðslumaður á Cafe Operu, sama ár aðstoðar- yfirmatreiðslumaður á hótel Holiday Inn.
• Árið 1989 var haldið suður til Keflavíkur þegar hann gerðist yfirmatreiðslumaður á Ránni.
• 1991 réð hann sig sem veitingastjóra á veitingastaðnum „Þotan“ í Keflavík.
• Árið 1994 gerðist hann yfirmatreiðslumaður á KÁ Fossnesti.
• 1997 var haldið suður til Keflavíkur aftur, enn þá sem Sous Chef í Officera Klúbbnum.
• 1999 var hann ráðinn á KÁ hótel Selfoss sem yfirmatreiðslumaður.
• Árið 2000 var enn og aftur haldið til Keflavíkur, en nú sem veitingastjóri á KÁ Flughótel í Keflavík.
• Hann hefur setið í Fræðsluráði síðan 2003 og árið 2005 fór hann í tvígang til Malasíu að kynna Íslenskan fisk.

Hann hefur verið á sýningum í Kaupmannahöfn, London, Frankfurt, Berlin, Chicago, Hong Kong, Lyon & Kuala Lumpur og kynnt íslenzkan mat á Concorde Hotel og Sullivan County Community Colleges í New York fylki í Bandaríkjunum, Íslenska sendiráðið í London sem og í þjóðmenningahúsi og sendiráð Íslendinga í Kaupmannahöfn.