Fjáröflunarhádegisverður til styrktar þolenda jarðskálftanna í Nepal

Eins og flestum er kunnugt reið risaskjálfti yfir Nepal þann 25. apríl síðastliðinn og annar slíkur þann 12. maí. Fórnarlömbin telja hátt í 10 þúsund manns og rúmlega 20 þúsund eru slasaðir og milljónir fjölskyldna hafa misst heimili sín. Enn ríkir neyðarástand í landinu og ekki búist við að breyting verði á í bráð. Nepalskt samfélag er einkar berskjaldað og þörfin fyrir hjálpargögnum og neyðaraðstoð er aðkallandi.

Haldin verður hádegisverður til styrktar fórnarlömbum jarðskjálftanna í Nepal á Nauthól næstkomandi sunnudag 31. maí og er viðburðurinn haldin á vegum Félags Nepala á Íslandi og Rauða Krossins.

Neyðarsöfnun hjá Rauða krossinum er enn í fullum gangi. Hægt er að styrkja með því að hringja í símanúmerin 904 1500, 904 2500 og 904 5500. Síðustu fjórir tölustafirnir er gjafaupphæðin sem bætist við næsta símareikning. Einnig er hægt að borga með kreditkorti eða leggja inn á reikning 0342-26-12, kt. 530269-2649.
Mynd: raudikrossinn.is

Yfirkokkur verður Shyam Thapa, matreiðslumeistari á Múlakaffi, sem bregður út af íslenskum vana og fær loksins að reiða fram hefðbundna rétti frá heimalandinu.

Nauthóll leggur fram húsnæði og starfsfólk án endurgjalds og allt matreiðslu-og þjónustufólk gefur vinnu sína. Allur ágóði rennur óskiptur til hjálparstarfs í Nepal þar sem milljónir fjöldkyldna hafa misst heimili sín.

Matseðillinn er eftirfarandi, sem er, vægast sagt, einkar frambærilegur:

Chicken Curry
Hefðbundin kjúklingur í karrí, niðursoðin í lauk og tómat og kastaníu hnetum, kryddaður með engifer, hvítlauk og ferskum chili-pipar

Veda ko masu ko Masala
Lambakjötsréttur, niðursoðin í kryddlegi með kjúklinga og nýrnabaunum

Mo:mo
Nepalskur/Tíbetskur réttur. Fylltar deigbollur með krydduðu svínakjöti

Golbheda ko achaar
Krydduð sósa með tómat, kúmen og engifer. Borðuð með mo:mo

Sel roti
Sætt hringlaga djúpsteikt hrísgrjónabrauð

Achaar
Kryddað kartöflusalat með hvítkáli, gúrkum, rauðlauk, kóríander, hvítlauk, engifer og grikkjasmára, með grunni úr ristuðum og muldum sesamfræjum

Aloo Dum
Hægeldaðar kartöflur í kryddlegi

Pakoda
Hvítkál, gulrætur og laukur djúpsteikt í kjúklingabaunaraspi

Bhat
Hefðbundin hrísgrjón

Dahi
Jógúrt með mangó, til að fríska upp á bragðlaukana

Að lokum verður boðið uppá kaffi og Nepali chiiya (nepalskt te sem er soðið í mjólk með kryddjurtum) og fólk getur spjallað við gestgjafana og sín á milli, en dagskrána er hægt að lesa með því að smella hér.

Skráning á viðburðinn fer fram á www.icenepali.com

Mynd: af facebook síðu Nauthóls.