Dýrfirskir skrokkar á Facebook

Bræðurnir Sigurður Arnfjörð og Guðmundur Helgasynir á Hótel Núpi í Dýrafirði ætla á þessu hausti að taka sextíu sérvalda dýrfirska lambaskrokka, annars vegar til vinnslu í kjötvinnslunni á hótelinu og til matreiðslu þar og hins vegar til sölu í verkefninu Beint frá býli, þar sem þeir eru meðal þátttakenda.

„Við sóttum um styrki frá Nýsköpunarmiðstöð og Impru og fleirum en fengum synjun. Í staðinn fyrir að hætta við verkefnið ákváðum við að snúa þessu í aðeins aðra átt en við höfðum hugsað okkur. Annars vegar megum við vinna og matreiða kjötið á hótelinu en ekki selja það hrátt í lausasölu. Hins vegar erum við í verkefni sem kallast Beint frá býli og getum þar selt frá okkur í heilum skrokkum. Við ætlum að taka fáa skrokka í það núna. Kjötvinnslan á Núpi sem slík verður því bara notuð fyrir hótelið en verkefnið verður samt lifandi að því leyti að við seljum lambakjötið bæði matreitt fyrir gesti hótelsins og eins í átakinu Beint frá býli“, segir Sigurður.

„Þetta árið að minnsta kosti verðum við eingöngu með sláturlömb frá Hjarðardal í Dýrafirði. Við bræðurnir ætlum að hjálpa bóndanum að smala og draga í dilka og síðan ætlum við að sérvelja sextíu bestu skrokkana í þetta verkefni okkar bræðranna, að hluta fyrir hótelið og að hluta fyrir verkefnið Beint frá býli. Við höfum fengið töluvert af fyrirspurnum þannig að við erum nú þegar með tíu-fimmtán skrokka í forsölu en síðan ætlum við að auglýsa þetta á Facebook. Ég reikna með að við seljum þetta fljótt og ef vel gengur tökum við bara meira næst. Við ætlum ekki að taka fyrir meira en við getum örugglega selt. Á næsta ári tökum við þetta líklega allt í forsölu. Við ætlum ekki að gera þetta í neinum sprengingum heldur láta það fara stigvaxandi ár frá ári. Á þremur til fjórum árum verður þetta kannski komið í einhver hundruð skrokka“, segir Sigurður Arnfjörð Helgason hótelstjóri á Núpi í Dýrafirði.

Greint frá á Vestfirska vefnum BB.is

Mynd: BB.is

/Smári