Dominique í Lyon

Þessi fyrsti pístill er skrifaður frá hótelherberginu í Lyon, þar sem 100 manna hópurinn er loks búinn að innrita sig (ég var síðust!).

Við lentum á réttum tíma í 10°° og þurftu menn að kvarta undan því – allt of heitt! Engar áhyggjur, veðurfræðingar hér spá kólnandi og jafnvel snjókomu um miðja viku – en hlýindi heima, hvað verður þá sagt??!

Flugið var yndislegt. Þetta er vel í fyrsta skipti sem manni er boðið tvo matarbakka í þessu 4 klst flugi !  Stjórn klúbbs matreiðslumeistaranna stóð sig vel og tók sig út líka vel, maturinn var úr sama hráefni og er þema í ár á Bocuse d’Or, lúðu og kjúklingi. Namm. Flugfreyjurnar (tékkneskar) gerðu tilraun til að bjóða eigin matarbakka, sem án efa var í góðu lagi – en fengu mjög litlar (ef einvherjar) undirtektir.

Við fengum einnig afhentan veglegan bakpoka merkta klúbbnum og í pokanum voru ýmsir nauðsynjar fyrir dagana framundan: sönghefti, víkingahúfa, íslenskur fáni, eyrnatappa og fl. Sumir fóru beint á sýninguna þar sem finnst allt (já allt) sem varðar hótel- og veitingahúsarekstur, hinir fóru á hótelið, sem er 4**** gamaldags og sjarmerandi hótel í hjarta borgarinnar – svo er það handbolti, fótbolti eða einfalt rölt um Lyon.

Ég spjalla betur um sýninguna SIRHA næst, því það er ekki eingöngu Bocuse d’Or sem mun vera haldin á þriðjudag og miðvikudag – hér er líka keppt í eftirréttagerð (heimsmeistaramót), brauðgerð (sama hér) og margt annað. Upphitun fyrir stóru keppnina?

Aðsendur pistill frá Dominique, Lyon. (skrifaður 21 janúar 2007)
www.vinskolinn.is

[email protected]