BrewDog lokar 38 krám eftir greiðslustöðvun

BrewDog-barinn í Paddington í London, sem nú er í eigu Tilray Brands.

Skoska handverksbrugghúsið BrewDog hefur lokað 38 krám með skömmum fyrirvara í kjölfar þess að félagið fór í greiðslustöðvun. Þar með dregur verulega úr umsvifum fyrirtækisins á heimamarkaði, einkum í Englandi og Skotlandi.

Bandaríska drykkjar- og lyfjafyrirtækið Tilray Brands hefur keypt breska framleiðslustarfsemi BrewDog í Ellon í Aberdeenshire, ásamt vörumerkjum félagsins og ellefu krám í Bretlandi og á Írlandi. Kaupverðið nemur 33 milljónum punda, jafnvirði um 5,7 milljarða íslenskra króna miðað við núverandi gengi, að því er fram kemur á fréttavef BBC. Með samningnum eru 733 störf tryggð, en á móti missa 484 starfsmenn vinnuna.

Sameiginlegir skiptastjórar frá AlixPartners segja að ekkert tilboð hafi borist sem tryggði áframhaldandi rekstur félagsins í óbreyttri mynd. Engar greiðslur munu renna til hluthafa, þar á meðal þeirra sem tóku þátt í hlutafjáraflinu Equity for Punks. Áfram verður þó rekstur 18 sérleyfiskráa BrewDog utan beinnar eigu félagsins.

BrewDog var stofnað árið 2007 af James Watt og Martin Dickie og varð á skömmum tíma eitt þekktasta nafn í heimi handverksbjórs. Undanfarin ár hefur þó hallað undan fæti. Fyrirtækið tapaði 37 milljónum punda fyrir skatta árið 2024 og var það fimmta tapárið í röð.

Í júlí lokaði BrewDog jafnframt tíu krám víðs vegar um Bretland, þar á meðal flaggskipi sínu í Aberdeen.

Á Íslandi lokaði BrewDog 25. október á síðasta ári. Barinn var til húsa við Hverfisgötu í miðborg Reykjavík þar sem boðið var upp á skoskan handverksbjór. Reksturinn stóð í sjö ár og markaði ákveðinn kafla í sögu alþjóðlegra bjórkeðja hér á landi.

Sjá einnig: BrewDog kveður eftir sjö ár með stæl

Eftirfarandi staðir BrewDog hafa verið lokaðir

Í Englandi er um að ræða bari í Basingstoke, Bath, Bournemouth, Bristol á Baldwin Street og við Harbourside, Cambridge, Cardiff, Carlisle, Cheltenham og Exeter. Í London loka staðir í Soho, á Camden Road, Chancery Lane, Clerkenwell, Ealing, Hammersmith, Seething Lane, við Tower Bridge og í Wandsworth. Þá hafa barir í Liverpool, Manchester, þar á meðal DogHouse Manchester og Manchester Outpost, Milton Keynes, Newcastle, Norwich, Nottingham, Plymouth, Reading og Southampton verið lokaðir.

Í Skotlandi er lokað í Aberdeen, bæði við Castlegate og í Union Square, í Edinburgh við Cowgate, í Glasgow í Merchant City og á Argyle Street, auk staða í Inverurie, Perth, St Andrews og Stirling.

Eftirtaldir staðir hafa hins vegar verið seldir til Tilray Brands og halda áfram rekstri undir nýju eignarhaldi.

Í Englandi eru það Birmingham, London í Canary Wharf, Paddington, Seven Dials, Tower Hill og Waterloo, auk staðarins á Peter Street í Manchester.

Í Skotlandi eru það DogTap í Ellon og DogHouse Edinburgh ásamt staðnum á Lothian Road í Edinburgh.

Á Írlandi er það barinn í Dublin sem fellur undir kaupin.

Mynd: brewdog.com