Blómstrandi matarmenning á Local Food hátíðinni á Akureyri

Local Food sýningin verður haldin í Íþróttahöllinni á Akureyri laugardaginn 17. október næstkomandi.  Local food sýningin verður haldin annað hvert ár og tekur við af sýningunni Matur-Inn, en þá sýningu sóttu um 13-15 þúsund gestir þegar hún var haldin síðast árið 2013.

Local Food sýningin endurspeglar styrk Norðurlands sem stærsta matvælaframleiðslusvæðis landsins og er því kjörinn kynningarvettvangur fyrirtækja og einstaklinga í geiranum til að vekja athygli á framleiðslu, matarmenningu, veitingastarfsemi, matartengdri ferðaþjónustu og verslun þessu tengd.

Sýningin er fyrst og fremst sölusýning! Aðgangur að sýningunni verður ókeypis og er opnunartíminn frá klukkan 12-18.

Á Local Food sýningunni er ekki einungis hægt að smakka og kynna sér það besta í norðlenskri matvælaframleiðslu, þar eru einnig kynningarbásar frá veitingaaðilum og boðið verður upp á fyrirlestra um matarmenningu.  Gestum sýningarinnar gefst kostur á að fylgjast með Masterchef einvígi og keppni í svokallaðri Mistery Basket þar sem matreiðslumeistarar keppa sína á milli.

Matreiðslunema keppa um besta eftirréttinn, kaffiþjónar keppa í besta áfenga, óáfenga og fallegasta kaffidrykknum, barþjónar keppa sín á milli í kokteilakeppni og síðast en ekki síst gefst almenningi kostur á að taka þátt í keppni um bestu samlokuna.

Klúbbur matreiðslumeistara á norðurlandi hefur yfirumsjón með keppnunum.

Við hvetjum alla til að kíkja við og skoða og smakka á því sem norðurland hefur uppá að bjóða og jafnvel gera frábær kaup í leiðinni.

Veitingageirinn.is á staðnum
Undirritaður mun vera á svæðinu fyrir veitingageirann , mynda og skrifa fréttir frá hátíðinni líkt og gert hefur verið í gegnum árin.