Gæti orðið skortur á lambakjöti í sumar

„SÚ STAÐA gæti hæglega komið upp í sumar að bændur stæðu frammi fyrir því vandamáli að eiga ekki nægilegt lambakjöt inn á markaðinn.“ Þetta segir Özur Lárusson, framkvæmdastjóri Landssamtaka sauðfjárbænda, en mjög góð sala hefur verið á lambakjöti síðastliðin tvö ár.

Á síðustu 12 mánuðum hafa selst rúmlega 7.500 tonn af lambakjöti, en þetta er 18% meiri sala en var á árinu 2003. Það ár var reyndar versta ár sem sauðfjárbændur hafa upplifað.

Í fyrrasumar var allt lambakjöt í landinu að klárast þegar sláturtíð hófst. Söluaukningin sem varð í fyrra hefur haldið áfram á þessu ári. Özur segir að kjötbirgðir séu 8-10% minni núna en á sama tíma í fyrra. Það geti því orðið vandamál fyrir bændur að útvega nægilega mikið kjöt inn á markaðinn ef góð sala verði á lambakjöti í sumar. Hann segir að um 300 tonn af lambakjöti sem átti að flytja úr landi séu enn í landinu og þetta kjöt verði ekki flutt út nema í ljós komi að nægt framboð verði á kjöti á innanlandsmarkaði.

Özur segir að dregið hafi verið úr markaðssetningu á lambakjöti innanlands síðustu mánuði beinlínis vegna þess að birgðastaðan sé lág.

Útflutningur minnkar úr 36% í 8%
Markaðsráð kindakjöts hefur gert tillögu til landbúnaðarráðherra um að svokölluð útflutningsskylda á þessu ári verði 4-10%, en það þýðir að 7-8% af allri framleiðslu verða flutt úr landi. Ekki eru nema tvö ár síðan útflutningsskyldan var 36%. Þá voru 2.400 tonn flutt út, en nú eru horfur á að ekki verði flutt út nema 700 tonn.

Minni útflutningur hefur í för með sér tekjuaukningu fyrir bændur því að lægra verð fæst fyrir kjöt sem flutt er út. Özur segir að nú séu bændur í þeirri stöðu að þurfa að velja hvaða erlendu mörkuðum þeir eigi að sinna. Menn muni að sjálfsögðu eingöngu selja á þá markaði sem borgi hæsta verðið. Breytt gengi krónunnar geri það hins vegar að verkum að útflutningur á lambakjöti sé hagstæðari nú en í fyrra.

Greint frá í Morgunblaðinu
Eftir Egil Ólafsson 

[email protected]