Verðið á hvítlauk fimmtánfaldast

Heildsöluverð á hvítlauk í Kína hefur fimmtánfaldast frá því í mars á þessu ári, að því er LandbrugsAvisen hermir. Helsta ástæðan er talin vera sú að almenningur hamstri hvítlauk í þeirri trú að neysla hans dragi úr hættunni á að fá svínaflensu.

Þessi hækkun fylgir í kjölfar verðhruns sem varð á hvítlauk í upphafi efnahagslægðarinnar í fyrrahaust en það varð til þess að verulega dró úr framleiðslunni, en þetta kemur fram á vef Bændablaðsins bbl.is.

Kínverjar eru langstærstu framleiðendur hvítlauks í heiminum en 75% af heimsframleiðslunni á sér stað í Kína. Bent hefur verið á að önnur skýring en svínaflensan geti einnig átt þátt í verðhækkununum. Sögur herma að spákaupmenn hafi keypt mikið af hvítlauk og geymi hann þar til verðið hækkar enn meir. Sérfræðingur Morgan Stanley fjármálafyrirtækisins í Kína segir að með því að flytja hvítlaukinn úr einni geymslu í aðra sé hægt að þéna milljónir dollara.

Breska blaðið Financial Times vitnar í kínverskar sögusagnir þess efnis að hópar fjármálaspekúlanta og braskara sem hagnast hafi vel á braski með fasteignir og hlutabréf hafi nú snúið sér að hvítlauksmarkaðanum sem gefi vel af sér í augnablikinu, en þetta kemur fram á vef bbl.is.

/Smári