Þessir veitingastaðir verða í nýju mathöllinni á Glerártorgi

Nú er orðið ljóst hvaða veitingastaðir verða til húsa í mathöllinni á Glerártorgi sem verður opnuð innan skamms. Aðstandendur lofa áhugaverðri og fjölbreyttri upplifun á sex veitingastöðum.

Áætlað er að opna í september, en búið er að ganga frá samningum við alla og framkvæmdir við húsnæðið er á lokametrunum.

„Við erum komnir með öflugan og frambærilegan hóp fagmanna til að opna veitingastaðina í Iðunni mathöll. Um er að ræða sex rekstraraðila sem leggja sitt af mörkum til þess að mæta þörfum og löngunum bæjarbúa, eftir bestu getu,“

segja þeir Guðmundur Pétursson og Aron Lárusson, rekstraraðilar mathallarinnar í samtali við akureyri.net.

Eftirtaldir staðir verða í Iðunni mathöllinni:

La Cuisine, sem er franskt bistro

Fuego Taqueria, sem býður upp á mexíkóskan mat

Retro Chicken, sem verður með kjúkling og hamborgara á sínum matseðli

Pizza Popolare, sem eins og nafnið gefur til kynna býður upp á pizzur, sem er í eigu Arons og Guðmundar.

Þá verður einnig sushistaður í mathöllinni sem enn hefur ekki fengið nafn sem og kaffihús og bar sem líka er enn nafnlaus. Sá staður mun selja kaffi, kökur og smörrebröd á daginn og drykki á kvöldin.

Það er því ljóst að úrvalið í mathöllinni verður fjölbreytt og ættu því allir að geta fundið þar eitthvað við sitt hæfi bæði í mat og drykk.

Auglýsingapláss

Mynd: Smári / Veitingageirinn.is