Snædís, Hafliði og Marlís kynntu íslenska matargerð á ríkisheimsókn forsetahjóna

Norsku konungshjónin, Sonja og Haraldur (Ljósmynd: Jorgen Gomnæs) og forsetahjón Íslands Halla Tómasdóttir og Björn Skúlason (Ljósmynd: Aldís Pálsdóttir)
Samsett mynd: forseti.is

Forsetahjónin hófu í morgun þriggja daga ríkisheimsókn til Noregs, þar sem þau munu dvelja bæði í Ósló og Þrándheimi. Þorgerður Katrín Gunnarsdóttir, utanríkisráðherra, og Daði Már Kristófersson, fjármála- og efnahagsráðherra, taka einnig þátt í dagskrá heimsóknarinnar ásamt opinberri sendinefnd og viðskiptasendinefnd.

Gestgjafar forsetahjónanna eru Haraldur V. konungur og Sonja drottning, ásamt Hákoni krónprinsi og Mette-Marit krónprinsessu. Elsta dóttir þeirra, Ingrid Alexandra prinsessa, tekur auk þess þátt í sinni fyrstu ríkisheimsókn. Þrjár kynslóðir norsku konungsfjölskyldunnar verða því viðstaddar móttökuathöfn forsetahjónanna við Óslóarhöll.

Á vef Forseta Íslands kemur fram í tilkynningu að samhliða heimsókninni ferðast viðskiptasendinefnd til Noregs með fulltrúum um 40 íslenskra fyrirtækja. Þau taka þátt í hluta dagskrár með forseta og konungi, ásamt fulltrúum úr norsku viðskiptalífi. Sendinefndin er skipulögð af Íslandsstofu í samvinnu við Innovation Norway, Norsk-íslenska viðskiptaráðið, Grænvang, Íslenska sjávarklasann og Samtök fyrirtækja í sjávarútvegi.

Megináhersla viðskiptahluta heimsóknarinnar er að styrkja tvíhliða samstarf þjóðanna með því að styðja við sjálfbæra nýsköpun í bláa og græna hagkerfinu – þ.e. í sjávarútvegi og grænum orkuskiptum.

Snædís, Marlís og Hafliði elduðu fyrir forsetann og gesti hans

Snædís Xyza Mae Ocampo, Hafliði Halldórsson, Marlís Jóna Þórunn Karlsdóttir og Halla Tómasdóttir
Mynd: aðsend / Hafliði Halldórsson

Með í för eru Snædís Xyza Mae Ocampo, landsliðsþjálfari Kokkalandsliðsins, Marlís Jóna Þórunn Karlsdóttir, matreiðslunemi ársins 2025, og Hafliði Halldórsson, matreiðslumeistari. Þau sáu um matseldina við hátíðarkvöldverð í íslenska sendiráðinu sem Halla Tómasdóttir, forseti Íslands, hélt í gær.

Matseðill kvöldsins var glæsilegur og undirstrikaði gæði íslenskrar matargerðar:

Forréttur:
Steiktur íslenskur þorskur með gúrku- og eplasalati, Hollandaise-sósu og ferskum jurtum.

Aðalréttur:
Grillaður íslenskur lambahryggvöðvi með kartöflumauki, steiktum Shiitake-sveppum, Bok Choy, Feyki og lamba soðsósu.

Eftirréttur:
Skyrganache með aðalbláberja compote og bökuðu hvítu súkkulaði.

Ríkisheimsókninni lýkur í Þrándheimi síðdegis 10. apríl og snúa forsetahjónin heim til Íslands að kvöldi fimmtudagsins.