Vín, drykkir og keppni
Rauð úr ýmsum áttum … og kampavín.
Rothschild frá Chile
Franska vínfyrirtækið Baronne Philippe de Rothschild er farið að teygja anga sína víða. Það er löngu liðin tíð að þessi armur Rothschild-fjölskyldunnar einskorði sig við framleiðslu á Chateau-vínum frá Bordeaux en þekktast þeirra er Mouton Rothschild. Nýjasta afurð fyrirtækisins hér á markaðnum er Cabernet Sauvignon (1.290 kr.) frá Valle Central í Chile.
Þrúgurnar eru keyptar af chileskum bændum og vínið gert af hinum frönsku víngerðarmönnum Rothschild-fjölskyldunnar. Þetta er virkilega skemmtilegur Cabernet, þar sem einkenni þessarar þrúgu koma mjög vel fram. Þykkur og ljúfur ávöxtur, mikið af þroskuðum og sætum sólberjum, dökku súkkulaði og mildum tannínum. Vínið hefur góða þyngd og lengd. Vel gert Chile-vín í alþjóðlegum stíl. Rautt kjöt, grillað eða steikt væri kjörið meðlæti.
Santa Alicia Gran Reserva
Annað álitlegt Chile-vín er Santa Alicia Cabernet Sauvignon Gran Reserva 1998. Þetta er dökkt, þungt og mikið vín. Ilmur er mikill og þar best þroskuð ber, fyrst og fremst sólber, í bland við mikið af dökku súkkulaði, brenndum við og myntu. Það heldur áfram kraftmikið í munni, kryddað, með vott af kókoshnetum, vanillu og kryddi. Tannín eru tiltölulega mjúk en vínið hefur þokkalega snerpu. Það háir því hins vegar helst að á köflum er það nánast yfirkeyrt, það er eins og allt hafi verið sett í botn í víngerðinni. Krafturinn er mikill en lengdin hins vegar í meðallagi. Þetta vín þarf kröftugan mat til að það valti ekki yfir hann, grillað rautt kjöt, meðlæti og grillsósur ættu að hafa roð við því. Vínið kostar 1.650 krónur.
Mâcon frá d’Allaines
Mâcon er syðsta víngerðarsvæði Bourgogne. Raunar það sunnarlega að rauðvín eru gjarnan úr Gamay-þrúgunni líkt og í Beaujolais, nágrannahéraðinu í suðri. Hvítu vínin eru hins vegar framleidd úr Chardonnay, rétt eins og nær öll önnur hvítvín Bourgogne.
Oft eru þessi vín fremur lítil og létt miðað við stóru Búrgundarvínin af norðursvæðunum. Það var því einstaklega gaman að rekast á vínið
Mâcon La Roche Vineuse 2000, sem nýlega var tekið til sölu á sérlistanum (Heiðrún og Kringlan). Þetta er vín frá litlum framleiðanda, François d’Allaines, sem er af nýrri kynslóð franskra víngerðarmanna.
Í nefi má greina ferskan sítrusilm, smjör og hey. Vínið er snoturt í munni, steinefni, reykur og mjög hófstillt eikaráhrif. Þykkt, þurrt og þægilegt. Einstaklega gott matarvín fyrir humar, eða smjörsteiktan fisk með léttu meðlæti. Vínið kostar 1.660 krónur.
Champagne Pol Roger
Pol Roger Champagne Brut er glæsilegt kampavín. Það er mjög þurrt, með ágenga sýru, stíllinn flókinn, gífurlega þéttur og fágaður. Í nefi kex, þurrkaðar fíkjur og smjör, í munni er það lengdin og þéttleikinn sem heldur manni við efnið. Pol Roger er með bestu kampavínshúsunum og í þetta vín eru allar þrjár þrúgur héraðsins, Chardonnay, Pinot Noir og Pinot Meunier notaðar í svipuðum hlutföllum. Þetta kampavín kostar 2.790.
Le Rime
Banfi Le Rime er Toskana-vín, athyglisverð blanda úr þrúgunum Pinot Grigio og Chardonnay. Ég man ekki eftir að hafa séð þessa samsetningu, en hún er vel heppnuð. Það eru einkenni Pinot Grigio sem ráða ferðinni, þótt Chardonnay hafi meira vægi í blöndunni. Létt, ferskt og sýrumikið vín. Meðalþyngd í bragði og hreinn og fínn ávöxtur. Sumarlegt í nefi, sykurlegin Granny Smith-epli og sætur sítrus, lime og greipávöxtur. Þetta er ljúft vín, sem hentar vel sem fordrykkur. Vínið kostar 1.390 kr.
Georges Dubeouf Beaujolais-Villages
Georges Dubeouf er einhver traustasti framleiðandi Beaujolais-héraðsins og vín frá honum valda sjaldan vonbrigðum. Beaujolais-Villages 2000 frá Dubeouf hefur þykka blóma- og sæta berjaangan. Jarðarber og hindber koma fram í munni með léttri sýru, mjúkri áferð og þægilegri. Ljúft sumarvín. Þetta vín er gott með bragðmildum ostum, kjúklingaréttum og jafnvel grilluðum fiski.
Höfundur Steingrímur Sigurgeirsson.
Heimild ÁTVR

-
Keppni3 dagar síðan
Fréttavaktin: Kokkur ársins 2025
-
Keppni3 dagar síðan
Gabríel Kristinn Bjarnason er Kokkur ársins 2025
-
Keppni3 dagar síðan
Stóra stundin runnin upp – Úrslitakeppni Kokkur ársins 2025 fer fram í dag – Myndaveisla frá forkeppni Kokkur ársins og Grænmetiskokkur ársins
-
Keppni4 dagar síðan
Fréttavaktin: Grænmetiskokkur ársins 2025
-
Keppni5 dagar síðan
Landslið kjötiðnaðarmanna komið til Parísar – Heimsmeistaramótið framundan
-
Keppni3 dagar síðan
Andrés Björgvinsson er Gænmetiskokkur ársins 2025
-
Markaðurinn4 dagar síðan
Gefðu hlutunum nýtt líf – skoðaðu úrvalið hjá Efnisveitunni
-
Keppni4 dagar síðan
Keppninni Grænmetiskokkur ársins 2025 lokið – Úrslit kynnt í Bjórgarðinum á morgun