Opnuðu íslenskt bakarí í Prag

Davíð Arnórsson og Auður Ósk Vilhjálmsdóttir

Nýtt íslenskt bakarí var opnað í Prag í Tékklandi í hverfinu Malá Strana fyrir sex vikum. Davíð Arnórsson rekur súrdeigsbakaríið Artic Bakehouse í Prag ásamt unnustu sinni, Auði Ósk Vilhjálmsdóttur, og Guðbjarti Guðbjartssyni.

„Frá fyrsta degi var þetta vinsælt, við auglýstum ekki, opnuðum bara dyrnar. Frá og með þeim degi hefur bara verið bilað að gera,“

segir Davíð í samtali við Morgunblaðið.

Davíð segir opnunina hafa verið krefjandi:

„Við erum fyrst núna að ná tökum á framleiðslunni, maður talar ekki tungumálið og enskan er ekki á allra vörum hérna. Svo er þetta svolítill frumskógur, allt er afgreitt á pappír.“

Í bakaríinu má helst finna súrdeigsbrauð, krossant, ástarpunga, vínarbrauð, skonsur með bláberjum eða hindberjum og súkkulaði, súkkulaðikrossant og snúða með ostakremi. Mest fer af snúðum og ástarpungum.

Sjá samtal við Davíð í heild í Morgunblaðinu í dag.

Mynd: úr einkasafni / Davíð Arnórsson