Ómótstæðilegir krispí lakkríspinnar

Fyrir nokkrum áratugum síðan tóku íslensk ungmenni upp á þeim sið að para saman hinar klassísku Síríuslengjur og mjúka lakkrísborða. Þetta varð upphafið að langlífu ástarsambandi þessara tveggja bragðheima, sambandi sem alla tíð síðan hefur verið í miklu uppáhaldi hjá þjóðinni. Í kjölfarið fæddist Eitt Sett og fleiri vörur fylgdu í kjölfarið.

Það er því ekki að undra að uppskriftir að gómsætum kræsingum sem innihalda lakkrís í bland við súkkulaði skjóti upp kollinum í aðdraganda jóla og meðfylgjandi er einmitt ein slík úr nýjasta Kökubæklingi Nóa Síríus, krispí lakkríspinnar sem vafalítið munu gleðja unga sem aldna. Þar er Eitt Sett lakkrískurlið vinsæla í lykilhlutverki, enda löngu orðið ómissandi hluti af jólabakstrinum.

Krispí lakkríspinnar

Fjöldi 24-28 stykki

Hráefni:

• 100 g smjör

• 400 g Síríus suðusúkkulaði

• 450 g þykkt síróp (í grænu dósunum)

• 340 g Kellogg’s Rice Krispies

• 300 g Síríus Eitt Sett lakkrískurl

• 24-28 stk. íspinnaprik

• 150 g Síríus hvítir súkkulaðidropar (brætt)

• Síríus karamellukurl til skrauts

Aðferð:

1. Setjið smjör, suðusúkkulaði og síróp í pott og bræðið saman við meðalháan hita.

2. Leyfið blöndunni að malla í nokkrar sekúndur, takið af hellunni og blandið Rice Krispies saman við í nokkrum skömmtum. Að lokum er lakkrískurlið sett út í, blandið vel.

3. Setjið bökunarpappír á tvær plötur eða bretti. Dreifið blöndunni jafnt yfir, í tvo u.þ.b. 30 x 15 cm fleti. Miðið við að hafa þá um 3 cm að þykkt.

4. Leggið bökunarpappír ofan á blönduna og þjappið með annarri bökunarplötu/bretti til að slétta aðeins úr. Reynið að hafa fletina eins beina og hornlaga og þið getið.

5. Þá er að stinga íspinnaprikunum í blönduna miðja, sitthvoru megin, með jöfnu millibili, og þjappa svo vel að með fingrunum. Kæla í um klukkustund.

6. Skerið hvern flöt langsum eftir miðjunni og svo mitt á milli íspinnaprikanna sitt hvoru megin.

7. Að lokum má skreyta lakkríspinnana með bræddu hvítu súkkulaði og karamellukurli.