Nýtt veitingahús opnað í Ólafsvík

Veitingahúsið Hraun er í bjálkahúsi í hjarta bæjarins

Eigendur Hótels Hellissands ætla að opna veitingahús í Ólafsvík þann 1. maí næstkomandi.  Það er í bjálkahúsi í hjarta bæjarins þar sem áður var rekinn Kaffi Belgur. Hætt var rekstri Kaffi Belgs í desember síðastliðnum og hefur húsið staðið autt síðan.  Nýja veitingahúsið á að heita Hraun.  Það mun taka 70 manns í sæti og verður opið allt árið um kring.

Við höfum gert langtíma leigusamning um húsnæðið. Þarna verður á boðstólnum matur fyrir alla fjölskylduna með áherslu á hráefni úr Breiðafirði, það er bæði fiskmeti og skeldýr. Nú erum við að vinna við að gera húsnæðið klárt að innan og setja okkar svip á það

, segir Jón Kristinn Ásmundsson hótelstjóri á Hótel Hellissandi í samtali við skessuhorn.is.

Jón Kristinn segir að húsið sé mjög spennandi fyrir veitingarekstur. Það er mjög fallegt og stendur á besta stað í bænum niður við höfnina.

Þarna er hótel handan við götuna. Hinum megin er upplýsingamiðstöð fyrir ferðamenn og fjörugt líf blasir við á hafnarsvæðinu. Svo höfum við fossinn á bak við okkur og ána sem rennur framhjá.

, segir Jón Kristinn að lokum.

Mynd: skjáskot af google korti.

/Smári