Narfeyrarstofa sigraði kokteilkeppnina í Stykkishólmi með drykkinn Frú Möller

F.v. Ívar Sindri Karvelsson (skipuleggjandi), Þorbergur Helgi Sæþórsson (narfeyrarstofa) Kristinn Guðmundsson (narfeyrarstofa), Margrét Björnsdóttir (narfeyrarstofa), Benedikt Óskarsson (dómari), Jón Viðar Pálsson (skipuleggjandi)

Keppninni um titilinn “Kokteilbar Stykkishólms” fór fram síðastliðna helgi og voru úrslit kynnt við hátíðlega athöfn á Fosshóteli Stykkishólms. Það var Narfeyrarstofa sem sigraði keppnina með drykkinn Frú Möller og hlaut þar með nafnbótina: Kokteilbar Stykkishólms 2017.

Keppnin fór fram dagana 6. til 8. júlí 2017 og þátttakendur voru allir helstu veitingastaðir og barir í Stykkishólmi sem tóku þátt. Keppnisfyrirkomulagið var þannig að allir keppniskokteilar voru á sérstöku tilboði, þ.e. 1700 krónur á keppnisdögunum.

Dómnefndin: Unnur Steinsson, Helgi Eiríksson, Benedikt Óskarsson

Dómnefnd fór svo á milli staða, smakkaði kokteilana, grandskoðaði öll atriði. Til gamans má geta að í fyrra sigraði Hótel Egilsen með kokteilinn Hjartadrottninguna.

Heimamenn og aðrir voru duglegir að nýta sér klippikortin sem voru sérstaklega hönnuð fyrir kopkteilkeppnina, en hægt var að nálgast þau á keppnisstöðunum. Á verðlaunaafhendingunni var boðið upp á fría drykki sem höfðu 1 gat á kortinu, þeir sem höfðu 3 göt á kortinu fengu frían drykk og happdrættismiða og 6 göt = frír drykkur og bónus-happdrættismiði.

Verðlaunadrykkurinn

Verðlaunadrykkurinn frú Möller – Í honum er hundasúru krapís, jarðaber og romm

Frú Möller á Narfeyrarstofu

Verðlaunagripurinn glæsilegi er handgert listaverk eftir hana Siggu í Leir 7 – Þessi farandbikar er tilbúinn í að vera hjá sigurvegurum keppninnar á hverju ári fram að 2025

Veitingastaðir sem tóku þátt í ár voru:

• Hótel Egilsen
• Hótel Stykkishólmur
• Narfeyrarstofa
• Sjávarpakkhúsið
• Skúrinn
• Stykkishólmur Slowly

Veitingageirinn.is forvitnaðist um hvernig það kom til að halda kokteilkeppni á Stykkishólmi, hvernig þátttakan var og hvort bæjarbúar voru duglegir að nýta sér tilboðin:

Skipuleggjendur.
Jón Viðar Pálsson og Ívar Sindri Karvelsson

„Keppnin kom nú til bæði vegna þess að við höfum báðir mikinn áhuga á kokteilum og bjuggum saman og störfuðum í London við það fyrir nokkrum árum og líka vegna þess að okkur leiddist pínulítið og vildum bæta enn frekar við lífið hérna í bænum“

, sagði Jón Viðar í samtali við veitingageirinn.is

„Við hugsuðum þetta bæði sem skemmtun fyrir fólkið í bænum en líka sem hvatningu fyrir fólk til að prófa sig áfram, smakka eitthvað annað en bjór eða einfalda drykki eins og romm í kók eða gin og tónik. Fólk er oft svolítið hrætt við að prófa nýja hluti, sérstaklega þar sem kokteilar eru ekki ódýrir hérna á Íslandi og við vildum hafa þarna marga í boði á mjög góðu verði og það var að ganga mjög vel, langflestir sýndust mér smakka á öllum stöðum eða þá eins mörgum og þau höfðu tíma til að heimsækja yfir helgina.

Alveg eins og í fyrra (fyrsta sinn haldin 2016) þá gekk þetta vonum framar og viðtökurnar og þátttakan miklu betri en við áttum von á – og stemningin í bænum yfir helgina og sérstaklega á laugardagsnóttina var bara alveg hrikalega góð!“

Jón Viðar bætir við að þó að keppnin í grundvöllum breyttist ekki mikið síðan í fyrra þá var margt sem breyttist í skipulagningu og umgjörð og þar eiga þeir athugasemdir gesta að miklu leyti að þakka. Fyrir áhugasama er bent á að senda ábendingar og hugmyndir til að bæta hátíðina enn meira á næstu árum, að hafa samband í gegnum facebook síðu hátíðarinnar hér.

Lautarferð á Slowly Kaffi

Lady Marmelade (marmelaði) á Hótel Egilsen

Katla á Fosshótel

En Ilamas á Sjávarpakkahúsinu

Sveitti gangavörðurinn á Skúrnum

Myndir: skjáskot af Snapchat aðgangi veitingageirans