Myndir af Pósthús Food Hall – Bæði nýir og vinsælir veitingastaðir í nýju mathöllinni

Pósthús Food Hall opnaði 18. nóvember s.l. en hún er staðsett í gamla Pósthúsinu að Pósthússtræti 5 í miðbæ Reykjavíkur. Upphaflega átti Pósthúsið Food Hall að opna síðasta vetur en vegna tafa á ýmsum framkvæmdum og þá aðallega vegna covid var ekki hægt að opna á tilsettum tíma, en framkvæmdir stóðu yfir í tvö ár.

Pósthúsið Food Hall er glæsileg, eins og sjá má á meðfylgjandi myndum.

Eigendur eru Leifur Welding, Þórður Axel Þórisson og bræðurnir Ingvar og Hermann Svendsen, en þeir bræður hafa rekið og átt fjölda veitingastaða hér á Íslandi.

Eigendur eru greinilega með húmorinn í lagi, en á einum vegg Pósthússins má sjá listaverk eftir listakonuna Sísí Ingólfsdóttur sem á stendur: Afsakið enn eina mathöllina

Veitingastaðirnir

Samtals eru veitingastaðirnir níu, en þeir eru:

Funky Bhangra

Funky Bhangra er í eigu Yesmine Olsson og matseldin er undir áhrifum frá mörgum löndum, blanda frá Sri Lanka, Svíþjóð, Indlandi og Íslandi.

Pizza Popolare

Pizza Popolare, býður upp á Napólí pizzur eins og þær gerast bestar, þunnir botnar, flöffí kantar og með sérinnflutt ítölsk hráefni.

Fuku Mama

Fuku Mama, er nýr veitingastaður á Íslandi og býður upp á ekta Asískan grillmat.

Yuzu Burger

Næsta veitingastað þarf vart að kynna, en það er Yuzu Burger sem leggur áherslu á nýstárlegan og ferskan valmöguleika þegar kemur að hamborgurum á Íslandi. Matargerðin er sterklega undir austurlenskum og þá sérstaklega japönskum áhrifum.

Finsen

Finsen er nýr franskur bistró veitingastaður og býður upp á humarsúpu, fiskrétti og grillaðar steikur, smárétti t.a.m. ofnbakaðan camembert ofl.

Enoteca

Enoteca er nýr veitingastaður og matreiðslumeistari og eigandi staðarins er hinn landsfrægi Siggi Hall. Á staðnum er boðið upp á sérlagað pasta frá Ítalíu, ekta skinkur frá Ítalíu og Spáni. Hægt er að panta vín og platta með alls kyns ostum, hráskinku og pylsum.

Drykk

Drykk er nýr bar á Íslandi og býður upp á kokteila og kaffi og einnig er í boði bjórar og aðrir drykkir af ýmsu tagi.

Mossley

Mossley er veitingastaður með street food stíl og býður meðal annars upp á Taco, kjúklingavængi, andaborgara og trufflu franskar svo fátt eitt sé nefnt. Mossley er í eigu nokkurra Kársnesinga í Kópavogi.

Djúsí Sushi

Djúsí Sushi er systurveitingastaður Sushi Social. Staðurinn býður upp á handgert gæðasushi, poké skálar og smárétti til að njóta á staðnum eða taka með.

Myndir: aðsendar