Fiskbúðir sektaðar fyrir ófullnægjandi verðmerkingar

Neytendastofa framkvæmdi nýverið athugun á ástandi verðmerkinga í fiskbúðum á höfuðborgarsvæðinu. Var athugað hvort vörur væru verðmerktar með söluverði og einingarverði.

Í fyrstu athugun fóru starfsmenn stofnunarinnar í 18 verslanir. Niðurstöður athugunarinnar voru að fimm verslanir uppfylltu viðeigandi skilyrði um verðmerkingar en gerðar voru athugasemdir við verðmerkingar í 13 verslunum. Í flestum tilvikum voru merkingar í fiskborði í lagi og algengast að gerðar væru athugasemdir við að einingarverð vantaði samhliða söluverði á aðrar vörur en fisk. Þær verslanir sem uppfylltu ekki skilyrði fengu bréf frá stofnuninni þar sem skorað var á viðkomandi verslanir að lagfæra verðmerkingar sínar. Í kjölfarið framkvæmdi stofnunin síðan seinni athugun sína til að athuga hvort hæfilegar breytingar hefðu verið framkvæmdar.

Leiddi seinni athugun stofnunarinnar í ljós að þrjár fiskbúðir höfðu ekki bætt verðmerkingar sínar, n.tt. Fiskbúðin Sæbjörg, Fiskikóngurinn og Fylgifiskar. Taldi stofnunin rétt í ljósi fyrri tilmæla stofnunarinnar að sekta umræddar verslanir vegna brota á verðmerkingarreglum. Telur stofnunin það mikilvæga neytendavernd að fyrirtæki sem selja vörur og/eða þjónustu uppfylli öll viðeigandi skilyrði um verðmerkingar.

Ákvarðanirnar má finna hér á vef Neytendastofu.

Mynd: úr safni