Ferskur nýr White Ale-bjór frá Víking Craft Selection

Víking brugghús hefur undanfarna 18 mánuði unnið að þróun vandaðs White Ale-bjórs sem nú er kominn á markað. Bjórinn hefur hlotið nafnið Víking White Ale.

Bjórinn er léttur og hentar við margvísleg tilefni. Hann passar vel með grillmat og þá sérstaklega ljósu kjöti eins og fisk og kjúklingi. Hann er einnig tilvalinn með grænmetisréttum, sushi og mexíkóskum mat.

Bjórinn var bruggaður af Baldri Kárasyni, bruggmeistara Víking, og mikill metnaður og vinna var lögð í að fínstilla bragðið.

„Ég fékk það hlutverk að brugga besta White Ale í heimi. Það er ekki mitt að segja til um hvort það tókst en við erum ótrúlega ánægð með útkomuna“

, segir Baldur.

Bjórinn er bruggaður eins og hefðbundinn hveitibjór en jafnframt er ástríðuávöxtum, mangó og engifer bætt við blönduna. Engiferbragðið er ekki áberandi en gefur bjórnum frísklegan keim. Víking White Ale er mildur á bragðið og áfengisprósentan er 5% sem er algengt þegar hveitibjórar eru annars vegar.

„Það er þolinmæðisverk að finna þetta fullkomna jafnvægi, að sætleikinn í ávöxtunum haldi sér en um leið fái karakterinn í humlunum að njóta sín. Okkur tókst þetta að lokum og útkoman er einstakur bjór sem bragðast alveg frábærlega“

, segir Baldur.

Bjórinn fæst í kútum, 330ml flöskum og dósum. Hönnunin á umbúðunum er vísun í sólarstein sem víkingar til forna notuðu til þess að finna sólina þegar hún var hulin skýjum, enda njóta eiginleikar Viking White Ale sín einna best í sól og sumaryl.