Ferðin matarkistan Breiðafjörður

Áhugi okkar Sigurvins á þessari ferð var þess valdandi að við tókum að okkur að brauðfæða hópinn, en það tók okkur um 3 vikur að komast að niðurstöðu með matseðil sem allir voru sáttir með.

Fimmtudaginn 21. ágúst lögðum við Venni af stað vestur á nýja bílnum hans, er hann með aðgerðarstýri og leynihólfi fyrir sólgleraugun frægu og var mér að orði að nú vantaði bara formúlubúning til að fullkomna pakkann, brunuðum við út úr bænum gegnum göngin sem og Borgarnes, yfir Bröttubrekku, (en þá kom upp í huga mínum árið 1976 í mars þegar ég og Stefán Sigurðsson (Perlan) fórum vestur á Cortínunni hans til að taka Sunnu grísaveislu á Hótel Stykkishólmi, en á áðurnefndum stað festum við bílinn og urðum að snúa til baka og fara Mýrarnar og er við komum að Vegamótum birtist bíll með blikkandi ljós í öllum regnbogans litum og voru þar á ferð Hafsteinn lögreglumaður og Hörður Sigurjónsson hótelstjóri og kl. 04;20 að nóttu til) og í Búðardal, áðum við þar í vegasjoppunni og hvað haldið þið í þessu litla bæjarfélagi var viðurgjörningur til fyrirmyndar og vonuðum við að þetta væri ekki einsdæmi á hringveg 1.

Næsti viðkomustaður var bærinn Nýp á Skarðströnd við Breiðafjörð, en þar skyldum við gista og elda matinn.  Fararstjórarnir voru mættir þær Laufey Steingrímsdóttir og Guðrún Hallgrímsdóttir ásamt húsbóndanum á Nýp Sumarliða Ísleifssyni, en von var á húsfreyjunni Þóru Sigurðardóttur seinni part föstudags, var farið yfir plan helgarinnar svo allir væru vel upplýstir, að því búnu tóku allir náðir.

Á föstudeginum var strax byrjað að undirbúa eftir morgunmat að hætti hússins kjarn íslenskur og bragðgóður með eindæmum, gekk undirbúningur vel, en von var á hópnum um sexleitið, og myndu þau fyrst koma sér fyrir á bænum Þurranesi þar rétt hjá en þar skyldu þau gista og kæmu svo yfir á Nýp til kvöldverðar.

Matseðill kvöldsins var:

Forréttur
Harðskafi ( harðfiskur og smjör blandað saman ) á flatbrauði
Íslensk kindakæfa á rúgbrauði

Aðalréttur
Kofnasúpa ( Lundasúpa ) lundi, kartöflusmælki og skarfakál
Gerdeigsbrauð að hætti Venna bakað á staðnum

Drykkjarföng
Bolla blönduð úr  Krækiberjasafa, mysu, hunangi og eplasafa

Var hópurinn mjög ánægður með mat og drykk ,og hrósuðu við happi ég og Venni þar sem við höfðum aldrei lagað lundasúpu fyrr.  Að því loknu var farið í koju því strangur dagur var framundan.

Laugardagur byrjaði kl. 07:00 með undirbúningi á morgunmatnum sem var hefðbundinn utan grauts sem Guðrún sá um að laga og  heitir Gabríels- grautur lagaður úr lífrænt ræktuðu byggi frá Eymundi Magnússyni í Vallanesi á Fljóstdalshérasði, sagði hún mér að þegar hún var farastjóri og hópurinn orðinn leiður á hafragrautnum hafi Vilko ávaxtasúpu verið bætt út í til tilbreytingar.  Að morgunverði loknum fór hópurinn í sínar skoðunarferðir og skyldi hópurinn mæta  kl. 13:00 að Stað í Reykhólasveit í hádegisverð hjá Eiriki Snæbjörnssyni og frú, að undangenginni skoðunarferð um staðinn.

Matseðillinn á Stað
Súrsað selspik, grillaður selur, reyktur selur, reyktur lundi, sauðahangikjöt, ungskarfabringur í raspi, reyktur rauðmagi á rúgbrauði, grilluð grásleppa, sviðasulta, kartöflumauk, baunasalat brauð og smjör, var dekkað upp borð í bílskúrnum á stað og var hópurinn alveg í skýjunum yfir móttökum og viðurgjörningi Staðarmanna, að borðahaldi loknu hélt hópurinn áfram för sinni, en við Venni brunuðum að Nýp til að undirbúa kvöldið.

/Sverrir