Falsaðar samfélagssíður í nafni MS

Óprúttnir aðilar hafa stofnað falsaðar síður bæði á Facebook og Instagram í nafni Gott í matinn – matargerðarlínu MS.

Þessir aðilar hafa verið að tilkynna vinningshafa í Kitchenaid gjafaleiknum sem að MS hefur staðið fyrir.

Í tilkynningu frá MS segir meðal annars:

„Okkur þykir þetta mjög leitt og biðjumst innilega velvirðingar á þeim ruglingi sem þetta kann að valda og viljum biðja ykkur að smella á tilkynna/report við bæði skilaboð sem þið kunnið að hafa fengið send og eins ef þið rekist á þessar svindlsíður svo þær hverfi sem fyrst.

Þessar svindlsíður biðja fólk um að smella á hlekki og skrá persónuupplýsingar og/eða kortanúmer en hvorki MS né önnur íslensk fyrirtæki biðja um slíkar upplýsingar í gjafaleikjum sínum. Alls ekki gefa upp neinar persónuupplýsingar eða kortanúmer í gegnum þessa síðu eða aðrar svipaðar.“

Mynd: facebook / Gott í matinn – Matargerðarlína MS