Eldur kom upp í eldhúsi Sigló hótel

Eldurinn kom upp í nýjum steikarpotti sem tekinn var í notkun í gærmorgun.

Um hádegisbilið í gær kom upp mikill eldur í nýbyggðu eldhúsi veitingarstaðarins Sunnu sem er hluti af hinu nýja og glæsilega Sigló hótel á Siglufirði.

Fumlaus viðbrögð starfsfólks urðu til þess að betur fór en á horfðist.  Hótelið opnaði fyrir aðeins viku síðan en Róbert Guðfinnsson athafnamaður segir stefnt að því að koma eldhúsinu í lag fyrir verslunarmannahelgi, að því er fram kemur á mbl.is.

Einn starfsmaður slasaðist á höndum við að reyna hindra útbreiðslu eldsins og var fluttur á sjúkrahúsið en hann mun ekki vera alvarlega slasaður, segir í frétt á siglo.is.

Eldurinn kom upp í nýjum steikarpotti sem tekinn var í notkun í gærmorgun.  Róbert segir í viðtali við mbl.is að eitthvað; galla í pottinum eða mistök, hafa orðið til þess að hann ofhitnaði og það kviknar í feiti.  Eldurinn læsti sig í eitthvað fleira en pottinn og rúður sprungu en aðallega var um að ræða reykskemmdir, að sögn Róberts.

Meðfylgjandi mynd tók Jón Ólafur Björgvinsson fréttamaður á siglo.is.  Fleiri myndir er hægt að skoða á vef siglo.is með því að smella hér.