Einföldun í rekstri hjá Ölgerðinni

Ölgerðin var stofnuð árið 1913.
Fyrsta lestarferðin á Íslandi var farin þann 17. apríl 1913 þegar fyrsta grjóthlassið var sótt úr Öskjuhlíð til hafnargerðarinnar í Reykjavík. Sama dag hóf Tómas Tómasson rekstur Ölgerðar Egils Skallagríms-sonar í tveimur kjallaraherbergjum í Þórshamri við Templarasund.
Umsvifin voru ekki mikil í fyrstu. Suðuketillinn var einungis 65 lítrar og flöskunum var lokað með því að þrýsta tappa oní með flötum lófa og binda fyrir með vír. Fyrsta framleiðsluárið seldi Ölgerðin um 38 þúsund lítra, mest Maltextrakt og Hvítöl. Íbúar Reykjavíkur voru þá um 13 þúsund talsins.
Mynd: olgerdin.is

Rekstur Ölgerðarinnar Egils Skallagrímssonar verður einfaldaður og hluta lagerstarfsemi og dreifingar verður útvistað til að takast á við vaxandi umsvif og auka sveigjanleika. Ölgerðin verður frá og með næstu mánaðamótum alhliða drykkjarvörufyrirtæki en allur annar innflutningur verður á sama tíma hjá dótturfyrirtækinu Danól.

„Starfsemi okkar hefur margfaldast á undanförnum árum og síkvikt viðskiptaumhverfi kallar á að fyrirtæki leiti allra leiða til að gera hlutina betur, auka möguleika til vaxtar, hagræða og styrkja sig enn frekar á markaði. Fyrirtæki sem fylgist ekki með breytingum og aðlagar sig ekki að nýjum aðstæðum verður í vanda og við höfum óhikað tekið ákvarðanir sem þessar til að halda okkur í fremstu röð,“

segir Andri Þór Guðmundsson, forstjóri í fréttatilkynningu frá Ölgerðinni.

„Ölgerðin er og hefur verið leiðandi á sínu sviði sem afburða drykkjarvörufyrirtæki í 106 ár og með þessum breytingum verður fyrirtækinu gert kleift að styrkja enn frekar eigin framleiðslu og innflutning á drykkjarvöru. Danól verður með alla matvöru, snyrti- og sérvörur, ásamt vörum til stóreldhúsa og er óhætt að fullyrða að einfaldara skipulag mun skerpa fókusinn og losa um vaxtahömlur,“

segir Andri Þór.

Auk einföldunar í rekstri verður hluta lagerstarfsemi og dreifingar útvistað og vegna þessara breytinga fækkar starfsmönnum um 25 hjá Ölgerðinni, þvert á öll svið fyrirtækisins, en hluta þeirra býðst að taka við störfum í tengslum við útvistunina.

Starfsemi Danól verður í framhaldi flutt í húsnæði gegnt Ölgerðinni á Fosshálsi en þessar breytingar og útvistun á lagerstarfsemi og dreifingu gera Ölgerðinni kleift að vaxa og auka enn frekar vöruþróun eigin vörumerkja.